Klosi:70% e të rinjve që mbarojnë
arsimin profesional, punësohen

Më shumë se 70% e nxënësve që mbarojnë arsimin profesional, punësohen brenda një viti. Kështu u shpreh ministri i Mirëqenies Sociale Blendi Klosi gjatë një seance dëgjimore në Komsionin e Edukimit, ku raportoi për gjendjen e arsimit profesional.
 
Sipas Klosit nuk mund të pranohet që një i ri të ketë diplomë juridiku dhe më pas të kalojë në arsimin profesional.

“Jemi në rangun kur 73 % e nxënësve nga arsimimi profesional shkojnë drejt tregut të punës. Shkollat të cilat vijnë në qendrat e mëdha urbane dhe shkollat që janë realisht si qendra ekselence, apo shkollat që realisht kanë vlerë në tregun e arsimit profesional, janë 100 % e nxënësve jo të punësuar kur mbarojnë shkollën por që në bankat e shkollës.

Një vajzë apo një djalë që mbaron arsimin profesional ka mundësinë të jetojë me  punë të denjë. Kjo është gjithë logjik, po të bëjmë një mekanik jurist, ai e ka shumë të vështirë të bëhet një mekanik i mirë”, deklaroi ministri Klosi. 

Në këtë seancë dëgjimore nuk munguan as debatet mes Klosit dhe deputetëve të opozitës, të cilët hodhën akuza se arsimi profesional, po degradohet.
 
Debate pati edhe për nxënësit me mesatare më pak se 6, të cilët sipas deputetëve të opozitës nuk mund të vazhdojnë universitetin, por as nuk ndjekin dot arsimin profesional, për shkak të mesatares shumë të ulët.
 
Ndërkohë Ministri Blendi Klosi u shpreh se nuk është e mundur të ndërtohen shkolla të reja profesionale, për shkak se nuk ka fonde. Nga ana tjetër Ministria e Mirëqenies Sociale ka gati ligjin i ri për arsimin profesional.

Redaksia Online
Al.N/Shqiptarja.com