'Koha për të reflektuar', Meta për anti-shpifjen: Të mos ecim me kokëfortës në rrugën e censurës dhe autoritarizmit

TIRANE- Presidenti Ilir Meta ka reguar sërish lidhur me paketën anti-shpifje pas paralajmërimit të socialistëve se do ta rrëzojnë në Kuvend, një ditë pas refuzoi dekretimin e saj, duke e kthyer sërish në Kuvend. Meta thotë se është koha për reflektim, dhe për të mos ecur me kokëfortësi në rrugën e censurës dhe autoritarizmit, e cila sipas tij do të përbënte një rrezik për të ardhmen europiane të Shqipërisë

"Të dashur qytetarë, Liria e shprehjes, liria e medias dhe e drejta e informimit, përveç se janë të drejta themelore kushtetuese, janë të lidhura ngushtë me parimin e ndërtimit dhe funksionimit të një shteti demokratik.Shqipëria dy vitet e fundit ka një përkeqësim të këtyre treguesve, sipas konkluzioneve të organizatave prestigjoze ndërkombëtare të gazetarëve, si dhe të institucioneve ndërkombëtare që monitorojnë respektimin e lirisë së medias.

Ndaj është koha për të reflektuar dhe për të mos ecur me kokëfortësi në rrugën e censurës dhe autoritarizmit, që do të përbënte rrezik për të ardhmen europiane të Shqipërisë. Edhe njëherë, i ftoj të gjithë të lexojnë me vëmendje argumentat kushtetuese dhe ligjore të kthimit për rishqyrtim në Kuvend të paketës së ashtuquajtur “anti-shpifje”, tha Meta.

Kreu i grupit parlamentar të PS Taulant Balla deklaroi sot se Kuvendi do të rrëzojë presidentin Ilir Meta për paketën anti-shpifje, ndërsa e quajti vendimin e tij për ta kthyer mbrapsht një urdhër të kryedemokratit Lulzim Basha. 

TAG:
• Ilir Meta
• paketa antishpifje