Kolegji Zgjedhor i rrëzoi 2 kërkesat, Berisha fajëson Ramën: Është i tmerruar nga opozita! Urdhëroi mercenarët e tij të shkelin ligjin

Sali Berisha fajëson Edi Ramën edhe për rrëzimet e kërkesave të tij nga Kolegji Zgjedhor. Pas vendimit që në krye të koalicionit opozitar të vendoset emri i Ilir Metës dhe të jenë logot e të gjitha partive politike në fletët e votimit, Berisha thotë se këto vijnë se Rama është i tmerruar nga opozita.

Sipas Berishës, kreu i qeverisë ka dhënë urdhra që të merren këto vendime që sipas tij shkelin ligjet dhe Kushtetutën.

“A e konstatoni ju se në disa aspekte jemi më keq së në vitin 1991? Sepse lufta e egër e Edi Ramës ndaj opozitës është më e pashembullta që kur është themeluar PD. E ka kapur tmerri nga opozita dhe urdhëron mercenarët e tij të shkelin ligje dhe Kushtetutë, t’i emërojë koalicionit, kryetarin e koalicionit, të cilin ligji ia njeh në mënyrë eksplicite anëtarëve të koalicionit.

LEXO EDHE:
Ambasadori britanik takim lamtumire me kryeministrin Rama: Mbretëria e Bashkuar do të vazhdojë të mbështesë Shqipërinë

Mua më bën nder se tregon tmerrin që ka nga Sali Berisha, por problemi është shikoni se çfarë qëndrimi ka ndaj opozitës. Ai e di se opozita është shtyllë e demokracisë, por pavarësisht nga kjo, do të kontrollojë edhe opozitën. I duhet të vjedhë, të vjedhë sa më shumë”, tha Berisha.

Ditën e djeshme Kolegji Zgjedhor rrëzoi përfundimisht Koalicionin Berisha-Meta duke vendosur që në fletën e votimit për kandidatë për Këshilla Bashkiakë të vendoset emri i Ilir Metës si drejtues i koalicionit dhe jo ai i Sali Berishës. Po ashtu, Kolegji Zgjedhor vendosi që logot e partive të vihen krahas fletës së votimit për kryetarë bashkie, që do të thotë në fletën e votimit do të jetë edhe logoja e Partisë Demokratike. Ky vendim është përfundimtar dhe nuk mund të ankimohet, kështu që Sali Berisha e humb betejën në të gjitha shkallët, në KQZ, KAS dhe Kolegj Zgjedhor.

TAG:
• zgjedhjet vendore 2023
• sali berisha
• edi rama