Kongoli: Të hapen dosjet, të dalin
jashtë loje spekulantët

"Gjemia e mbytur" është romani më i ri i shkrimtarit Fatos Kongoli i cili u prezantua ditën e sotme në ambientet e Akademisë së Shkencave. Në rikthimin e autorit shumë shpejt me këtë roman pasi doli libri i tij i parafundit "Njeriu me fat" të gjithë aluduan që romani i tij kishte si subjekt diskutimin e hapjeve të dosjeve. Ndërsa vetë shkrimtari në një intervistë për A1 Report u shpreh se ky roman nuk ka lindur si ide e hapjeve të dosjeve. "Ideja e librit është tjetër, megjithëse, po të lexohet, këdo mund ta çojë tek kjo që thatë ju".
 
Por, gjatë intervistës Kongoli i pyetur rreth hapjes së dosjeve u shpreh se ato duhet të bëhen të ditura për të gjithë publikun pasi vetëm kështu mund të marrin fund spekulimet e të gjithë atyre që po i përdorin ato.
"Rreth problemit të hapjes dhe mos hapjes ka 25 vjet që është krijuar një mjegullnajë shumë e madhe nga e cila përfitojnë edhe njerëz spekulantë që e kanë bërë sport të denigrojnë të tjerët duke përfituar. Këta njerëz do të dalin jashtë loje",u shpreh Kongoli.


(Libri "Gjemia e mbytyr" prezantuar nga shkrimtari Fatos Kongoli)
 
Fatos Kongoli është ndër shkrimtarët e shquar shqiptarë, jo vetëm brenda kufijve të Shqipërisë, por dhe jashtë trojeve të saj. Fitues i disa çmimeve kombëtare dhe ndërkombëtare, ai ka marrë titullin e lartë në Francë, "Kalorës i Legjionit të Nderit", akorduar nga presidenti francez, Sarkozi. Librat e Kongolit janë botuar në 11 vende të ndryshme të Europës, e për ta kanë shkruar disa nga gazetat dhe revistat më të mëdha europiane.