Situatë kaotike dhe mungesë masash, - thotë deputetja demokratike Ina Zhupa,- se paraqesin kopshtet e çerdhet në Sarandë. Sipas Zhupës në një klasë numri i fëmijëve shkon deri në 70, gjë që e bën të pamundur kujdesin dhe edukimin siç duhet për ta.

Deputetja thotë se, për shkak të punimeve të papërfunduara në çerdhen e qytetit, fëmijët janë zhvendosur në Kopshtin nr. 1. Sipas saj, e njëjta situatë është krijuar edhe në Kopshtin nr. 5, ku janë transferuar fëmijët e kopshtit “Soros”, që ndodhet në rikonstruksion.

Zhupa u kërkoi institucioneve të ndërhyjnë pranë Bashkisë së Sarandës dhe kontraktorëve për përfundimin sa më shpejt të punimeve, në mënyrë që fëmijët të kthehen në godinat e tyre.

Deklarata e Ina Zhupës:

Mesa duket për bashkinë Sarandë ka qenë surprizë fillimi i vitit të ri shkollor. E them këtë sepse është një situatë kaotike, e pa organizuar për çerdhet dhe kopshtet e Sarandës, ndërkohë që duhet të ishin marrë masat që fëmijët e Sarandës të nisnin kopshtet dhe çerdhet normalisht. Unë sot ndodhem në Sarandë dhe mbrapa meje është “Kopshti nr. 1” i llogaritur për fëmijët e kësaj zone, ndërkohë janë të detyruar që të sjellin këtu dhe çerdhen e qytetit dhe klasat që ishin planifikuar për kopshtin të boshatisen që të shkojnë fëmijët e çerdhes.Dhe brenda të njëjtave klasa që ka kopshti janë bërë me 70 nxënës për klasë dhe kjo e bën të pamundur një proçes normal, edukativ, mësimdhënës për mirërritjen e fëmijëve, për zhvillimin e tyre psikologjik dhe social sepse fëmijët nuk janë sardele që ti mund t’i sistemosh në një kuti.

Fëmijët duan hapësirën e tyre, duan kohën e tyre dhe duan mundësinë për t’u zhvilluar, gjë që nuk i jepet duke bashkuar fëmijët e kopshtit dhe të çerdhes në një institucion të vetëm, duke mos e planifikuar Bashkia e Sarandës që punimet për çerdhen do duhet të kishin mbaruar në shtator. Por ky nuk është rasti i vetëm. Këtu është në mënyrë sistematike shkatërrimi i arsimit. E njëjta gjë ndodh dhe me dy kopshtet e tjera. Është në rikonstruksion kopshti “Soros” dhe fëmijët e kopshtit “Soros” kanë shkuar në Kopshtin nr. 5 dhe atje fëmijët janë bashkuar në klasa të përbashkëta duke kapur rreth 70 fëmijë në një klasë.

Kjo është një gjendje me të vërtetë kaotike e çorganizuar që dëmin ua bën fëmijëve të Sarandës. Ndaj duke ju përgjigjur dhe shqetësimit të prindërve jam këtu për t’i bërë thirrje të gjitha institucioneve të shtetit shqiptar që t’i bëjnë presion Bashkisë së Sarandës për të bërë detyrën e vetë, por t’i bëjnë presion edhe kontraktorit për të mbaruar sa më shpejt në mënyrë të tillë që të bëhet mësimi në godinat e paracaktuar për secilin institucion. Por ky është shembulli! Ky është shembulli i një bashkie që nuk e ka mendjen tek arsimi. Një bashkie që nuk ka profesionist, një bashkie që e ka mendje për të vjedhur taksat e qytetarëve dhe jo për t’i shërbyer atyre. Ndaj shumë shpejt është momenti që t’ia japim përgjigjen me votë edhe Bashkisë Sarandë për këtë keqmenaxhim që i bën qytetit.