Korçë/ Lokali te 'Pazari i Vjetër' ishte kthyer në 'strofull heroine', arrestohen dy persona (mes tyre një 18-vjeçare)

KORÇË- Dy persona janë arrestuar në qytetin e Korçës sepse kishin shndërruar lokalin në një "strofull" të shitjes dhe prodhimit të drogës.

Ky lokal gjendej në "Pazarin e Vjetër" të këtij qyteti, një nga zonat më turistike, teksa në pranga ka rënë një 31-vjeçar me inicialet H. T., 31 vjeç dhe një 18-vjeçare K. Z., të dy banues në fshatin Pojan të Maliqit.

Gjatë kontrollit të ushtruar nga uniformat blu, mësohet se janë gjetur sasi të konsiderueshme të drograve të forta, më konkretisht 73 doza dhe 77 gr lëndë e dyshuar narkotike heroinë, 30 kapsula metadoni dhe 1 peshore elektronike. Ndërkohë mes të tjera, iu gjet edhe një punonjëse e pasiguruar.

Droga e sekuestruar

Njoftimi i plotë i policisë
Operacioni nga Komisariati i Policisë Korçë dhe Seksioni për Hetimin e Narkotikëve në DVP Korçë, për goditjen e shpërndarjes së drogave të forta.  Përshtatën lokalin për përdorim droge dhe mbanin një punonjëse të pasiguruar, arrestohen në flagrancë 2 shtetas. Sekuestrohet lëndë e dyshuar narkotike heroinë  dhe kapsula metadoni.

Shërbimet e Komisariatit të Policisë Korçë, në bashkëpunim me specialistët e Seksionit për Hetimin e Narkotikëve në Drejtorinë Vendore të Policisë Korçë, në vijim të punës për goditjen e veprimtarisë kriminale në fushën e shpërndarjes së drogave të forta, bazuar dhe në informacione të siguruara në rrugë policore se dy shtetas ushtronin aktivitetin kriminal të prodhimit dhe shitjes së narkotikëve në një lokal të qytetit, kanë organizuar dhe finalizuar operacionin policor të koduar "Pazari", si rezultat i të cilit u bë kapja dhe arrestimi në flagrancë i shtetasve: 

• H. T., 31 vjeç, banues në fshatin Plasë, Maliq.
• K. Z., 18 vjeçe, banuese në fshatin Pojan, Maliq. 

Gjatë kontrollit që forcat e policisë ushtruan në lokalin në përdorim të këtyre dy shtetasve në lagjen nr. 8, në zonën e "Pazarit të Vjetër" në Korçë, iu gjetën 73 doza dhe 77 gr lëndë e dyshuar narkotike heroinë, 30 kapsula metadoni dhe 1 peshore elektronike, të cilat u sekuestruan në cilësinë e provës materiale.

Gjithashtu gjatë verifikimeve të mëtejshme, rezultoi se këta shtetas në lokalin në përdorim të tyre kishin një punonjëse të paregjistruar në skemën e sigurimeve.

Materialet i kaluan Prokurorisë Pranë Gjykatës së Shkallës së Parë Korçë për veprat penale "Prodhimi dhe shitja e narkotikëve, kryer në bashkëpunim"; "Përshtatja e lokalit për përdorim droge" dhe "Punësimi i paligjshëm".

Droga e sekuestruar

B.K./Shqiptarja.com

TAG:
• Korce
• droge
• arrestohen
• policia e korces