Përfundon seanca në GJKKO në ngarkim të kryebashkiakut të Tiranës Erion Veliaj dhe të 29 personave të tjerë fizikë e juridikë.

Prokurori Altin Dumani në një material të përmbledhur në 50 faqe kërkoi kalimin e dosjes për gjykim. Ndërsa avokatja Romina Zano që mbron në këtë proces biznesmenin Elman Abule kërkoi pushimin e çështjes, ose në alternativë gjykim të shkurtuar.

Mbrojtësit e tjerë ligjorë kërkuan kohë për tu shprehur. Seanca e radhës u caktua në datë 17 nëntor.

Veliaj akuzohet për një sërë veprash penale si pastrim parash, mosdeklarim pasurie, korrupsion pasiv në 9 episode, shpërdorim detyre si dhe futje të sendeve të ndaluara në qeli. Ndërsa bashkëshortja e tij Ajola Xoxa, akuzohet për mosdeklarim pasurie, fshehje të të ardhurave si dhe pastrim parash. E përshirë në këtë dosje është edhe ish-deputetja socialiste Klotilda Bushka, e cila akuzohet për veprime që pengojnë zbulimin e së vërtetës.

Më datë 3 nëntor Kushtetuesja i dha të drejtë Erion Veliajt duke e lënë në detyrë si kryebashkiak i Tiranës. Kushtetuesja rrëzoi vendimin e qeverisë për shkarkimin dhe shfuqizoi dekretin e Presidentit Bajram Begaj për shpalljen e zgjedhjeve në Tiranë.