Kosovë, "Amnistia", 6000 qytetarë
nënshkruajnë peticion kundë

PRISHTINË - Deri në orën 12:00 të ditës së sotme, afër 6 mijë qytetarë kanë nënshkruar peticionin kundër Projektligjit për Amnisti.

Këtë gjë e konfirmoi për gazetën “Zëri”, Ilir Deda, drejtor ekzekutiv në Institutin Kosovar për Hulumtim dhe Zhvillim të Politikave – KIPRED. Sipas tij, ky peticion do të jetë i hapur deri të premten.

“Deri në orën 12:00 të ditës së sotme, kanë qenë afër 6 mijë nënshkrime kundër Projektligjit për Amnisti. Këto shifra janë nga e gjithë Kosova, por nuk janë shifra përfundimtare”, ka treguar Deda, i cili shtoi se deri të premten pret që të rritet numri i nënshkrimeve, që nevojiten për t'u dërguar në Presidencë.

Numri i nevojshëm për ta kundërshtuar Projektligjin për Amnisti është 10 mijë nënshkrime. Po ashtu gjatë ditës së sotme është shtuar edhe numri i protestuesve para Kuvendit të Kosovës, të cilët sot kanë hyrë në ditën e pestë të protestës. Kjo protestë është organizuar nga shoqëria civile, por e veshur nën petkun e Lëvizjes Vetëvendosje.

Nesër, ky grup protestuesish në orën 11:00 do të protestojnë para Kuvendit të Kosovës kundër miratimit të Ligjit të Amnistisë. Kjo ndodh teksa shefja e Politikës së Jashtme të BE, Catherine Ashton gjendet në Prishtinë dhe komentoi sot edhe mbi pr/ligjin për amnistinë.

E pyetur për Projektligjin e Amnistisë dhe përfshirjen e amnistimit të krimeve ekonomike, të kryera në gjithë territorin e Kosovës, Ashton ka thënë se nuk dëshiron të përfshihet në atë se si qeveria dhe kryeministri i çojnë përpara çështjet, që janë të rëndësishme për ta. Por, ajo ka kërkuar përkushtim edhe nga Kuvendi për punën që po bëhet në Bruksel.

“Interesi im është, që të sigurohem se ajo për të cilën është rënë dakord është të implementohet dhe shpresoj se zbatimi i ligjit do të jetë demonstrim i përkushtimit jo vetëm nga ana e qeverisë, por edhe nga Parlamenti për punën, që po bëjmë”, ka thënë Ashton.

Redaksia Online
(mag/shqiptarja.com)