Kosovarët: Në kampet e Hungarisë
po na keqtrajtojnë, kushte mizore!

Gjendja e emigrantëve kosovarëve që gjendën nëpër burgjet dhe kampet e Hungarisë vazhdon të jetë alarmante. Disa nga ata që janë të ngujuar, raportojnë për kushte mizore në këto burgje, ndërsa kërkojnë angazhim institucional nga Prishtina, për t’u kthyer në shtëpi.

Një qytetar nga Prizreni, i cili gjendet në një kamp në kufi me Rumaninë, ka rrëfyer për keqtrajtimet që po u bëhen të burgosurve në burg. Ai nëpërmjet KTV-së u ka bërë thirrje shtetit përfaqësuesve të shtetit të Kosovës, që t’i ndihmojë.

Halit Jonuzaj ka treguar nëpërmjet telefonit se janë të mbyllur në një kamp afër  Rumanisë, ku janë të keqtrajtuar vazhdimisht. Ai ka treguar se nuk di asgjë për fatin e disa shokëve të tij, të cilët kishin shkuar bashkë në Hungari, me idenë për të dalë në vendet e BE-së.

Të gjithë qytetarët e Kosovës, të cilët gjenden në burgjet dhe kampet e Hungarisë dhe Francës, duhet të presin ende që t’iu bëhet një zgjidhje dhe të kthehen në shtëpitë e tyre.
Ata do të vazhdojnë jetojnë në kushte të mjerueshme, ndërsa Qeveria është zotuar se do të bëjë aq sa mundet për gjetjen e një zgjidhjeje për ta.

Gjatë këtij viti 5 400 kosovarë kanë hyrë ilegalisht në Hungari dhe aktualisht në këtë shtet ndodhen rreth 1 100 prej tyre, më shumë se  250 në burgje dhe të tjerët në kampe të lira. Ikja drejt BE-së, kohën e fundit është bërë temë e ditës, pasi që të rinjtë e shumë fshatrave kanë ikur për një jetë më të mirë.

Redaksia Online
(mag/shqiptarja.com)