Kosovrasti: S'ka pasur mbledhje
as vendim për shkarkimin tim

TIRANE - Ish-Kryetari i Këshillit Bashkiak të Tiranës, Njazi Kosovrasti i cili u shkarkua vetëm një ditë më parë nga ky post me 31 votat e të majtëve, të cilët kanë shumicën në Këshillin Bashkiak, në një prononcim për mediat u shpreh sot se ky akt është i paligjshëm dhe se Bashkia e Tiranës do të paraqesë denoncim për shpërdorim detyre.

"Unë po e them me përgjegjësinë e të qenurit kryetar i Këshillit Bashkiak të Tiranës, që ajo që ka ndodhur një ditë më parë është e paligjshme në të gjitha drejtimet. As mbledhje e Këshillit Bashkiak nuk ishte as vendim nuk është. Ishte një organizim i paligjshëm, një grumbullim i paligjshëm. Ishte një deklarim i një vullneti të tyre, është e drejta e tyre. Po përgatitet denoncimi për tejkalim, shpërdorim të detyrës, qoftë edhe për vetë këshilltarët që në mënyrë të dhunshme u futën në ambientet e Bashkisë së Tiranës", - tha Kosovrasti në një prononcim për gazetarët, pas mbledhje së KQZ ku u regjistruan dy koalicionet e kryesuara nga PS dhe PD.


Dje anëtarët e majtë në Keshillin Bashkiak të Tiranes votuan për shkarkimin nga detyra të kreut të këtij Këshilli dhe në vend të tij u emërua Aldrin Dalipi. Të majtët kanë shumicën e këshilltarëve në Bashkinë e Tiranës

(ad.ti/shqiptarja.com)

TAG:
• kqz