KQZ: 2.8 mln lekë për asgjësimin e
fletëve të votimit në zgjedhjet e '13

TIRANE - Komisioni Qendror i Zgjedhjeve do të përdorë rreth 2.8 milion lekë për asgjësimin e fletëve të votimit, si dhe hapjen e kutive të votimit të përdorura në zgjedhjet e përgjithshme të vitit 2013.

Vendimi u mor sot gjatë mbledhjes së KQZ-së me votat e katër anëtarëve të pranishëm. Sipas anëtarëve ky vendim do të ketë kosto financiare më të ulët se ajo e parashikuar, në një vendim të mëparshëm të KQZ-së, në shkurt 2014.

Në mbledhjen e KQZ u diskutua ndryshimi i kostos lidhur me asgjësimin e fletëve të votimit të zgjedhjeve të 23 qershorit, ku fillimish fatura financiare për këtë proces, e përllogaritur nga administrata zgjedhore e KQZ-së kapte shifrën e rreth 4.5 milion lekëve. Kjo shifër u konsiderua e lartë nga ana e  Ministrisë  Financave, duke bërë kështu që KQZ të përcaktojë një faturë të re, e cila shkon në rreth 2.8 milion lekë.

Sipas kodit zgjedhor (neni 178), KQZ ka detyrimin të hapë të gjitha kutitë e votimit gjashtë muaj pas shpalljes së rezultatit përfundimtar të zgjedhjeve. Ky nen përcakton gjithashtu dhe kompetencën për mënyrën e asgjësimit të fletëve të votimit.

Nga praktika e deritanishme është njohur vetëm forma e djegies, por me ndryshimet e bëra në kod kjo formë nuk është më e detyrueshme dhe as e vetmja mundësi. Në këtë kuadër administrata vlerësoi si mënyrë asgjësimi me anë të riciklimit të letrës, e cila nuk ka pasoja për ambientin dhe që mund të sjellëpërfitime materiale.

Redaksia Online
(e.c/shqiptarja.com)

TAG:
• kqz