KQZ: 4 maji, afati i regjistrimit të
kandidatëve, fushata nis më 22 maj

TIRANE - Deri më 4 maj partitë politike duhet të kenë regjistruar në Komisionin Qendror të Zgjedhjeve kandidatët e tyre për zgjedhjet lokale të 21 Qershorit. Zëdhënësja e institucionit të vetëm për administrimin e zgjedhjeve, Drilona Hoxhaj, tha se ora 18:00 e 4 majit është afati i fundit për regjistrimin e kandidatëve dhe të listave shumëemërore të partive politike për Këshillat bashkiak. 

Deri në atë kohë forcat politike duhet të kenë zyrtarizuar të gjithë kandidatët e tyre për zgjedhjet e 21 qershorit. 

Pavarësisht se kandidatët e kanë nisur fushatën e tyre duke u prezantuar para elektoratit, Hoxhaj tha se nisja zyrtare e fushatës është data 22 maj.

Deklarata e Zëdhënëses së KQZ-së, Drilona Hoxhaj.                                      
Referuar dispozitave të Kodit Zgjedhor nenit  67, pika 1 dhe 2 dhe nenin 70 pika 1, për zgjedhjet për organet e qeverisjes vendore që do të zhvillohen më datë 21 qershor 2015, kandidatët për kryetar bashkie dhe lista e kandidatëve për këshillat bashkiak regjistrohen sipas rastit në KQZ apo KZAZ-të përkatëse, jo më vonë se 50 ditë përpara ditës së zgjedhjeve.

Afati e sipërcituar është i vlefshëm për partitë politike që konkurrojnë më vete, partitë politike pjesëtare të  dy koalicioneve të regjistruara në KQZ, si dhe për kandidatët e propozuar nga zgjedhësit.

KQZ ju bën me dije se duke qenë se data 1, 2 dhe 3 maj përkojnë me ditë pushimi zyrtar, afati përfundimtar për dorëzimin e dokumentacionit ligjor për regjistrimin e kandidatëve për kryetar bashkie apo të listave shumemërore nga subjektet zgjedhore, është data 4 maj ora 18.00.

Gjithashtu ju kujtojmë sa data e fillimit të fushatës zgjedhore nga partitë politike është data 22 maj.

Redaksia Online
(Gre.M/ Shqiptarja.com)

TAG:
• kqz