KQZ mblidhet me 4 anëtarë
Gjonçaj: U kthye në organ politik

TIRANE- Komisioni Qendror i Zgjedhjeve (KQZ) nisi sot normalisht mbledhjen pa 3 anëtarët e KQZ të propozuar nga opozita. Shkarkimi nga detyrara e anëtarit Ilirian Muho, i propozuar nga LSI, u pasua nga dorëheqjet e njëpasnjëshme të dy komisionerëve të PS-së, Denar Biba dhe Albana Shtylla. Ndërsa dje anëtari tjetër i KQZ-së, i propozuar nga PBDNJ, Jani Jani deklaroi pezullimin e veprimtarisë së tij, duke u solidarizuar me aktin e dy kolegëve.

Sot në KQZ, 3 karriget e opozitës janë bosh, ndërsa në vend të Ilirjan Muhos është ulur Klement Zguri i PR.

GJONCAJ I PS: NGJAN SI PIKE LOTI ME KQZ E 2011, LLESHI: S'JAM ANETARE POLITIKE
Përfaqësuesi ligjor i PS-së Genc Gjoncaj tha se KQZ është kthyer në organ politik. “E kam të pamundur të uroj anëtarin e ri të KQZ. Tre karriget e lëna bosh në këtë sallë flasin shumë aq sa dhe aktet qytetare të dorëheqjes si veprime civile dhe emancipuese. KQZ ka të njëjtët anëtarë të 2009 dhe 2011 që vërteton se është një organ politik. Ngjan si një pikë loti me atë të 2011”- tha përfaqësuesi ligjor i PS-së Genc Gjoncaj.
Në replikë kryetarja e KQZ-së tha “Klement Zguri ekspert i mirë i zgjedhjeve, i uroj mirëseardhjen. S'jam anëtare politike, kam konkurruar me CV për Kryetare KQZ


SKENDER TUFA KANDIDAT PER DEPUTET
Kreu i ish-të burgosurve politikë, Skënder Tufa pritet që të kandidojë për deputet në Qarkun e Tiranës. Kjo kërkesë pritet të shqyrtohet sot në mbledhjen e KQZ, institucion i cili do të ketë vetëm 4 anëtarë. Sot do të shqyrtohen edhe një sërë vendimesh të tjera që kanë të bëjnë me emra për kandidatë deputetësh.

“Shqyrtimi i Projekt-vendimit: “Për rregjistrimin e Komitetit Nismëtar i cili do të organizojë punën për paraqitjen e zotit Skënder Tufa si kandidat i propozuar nga zgjedhësit në Zonën Zgjedhore Tiranë, për zgjedhjet për Kuvendin të datës 23.06.2013”.

“Për rregjistrimin e Komitetit Nismëtar i cili do të organizojë punën për paraqitjen e zotit Alket Troka si kandidat i propozuar nga zgjedhësit në Zonën Zgjedhore Fier, për zgjedhjet për Kuvendin të datës 23.06.2013”.

Për rregjistrimin e Komitetit Nismëtar i cili do të organizojë punën për paraqitjen e zonjës Laureta Gjoni si kandidat i propozuar nga zgjedhësit në Zonën Zgjedhore Vlorë, për zgjedhjet për Kuvendin të datës 23.06.2013”, thuhet në njoftimin e KQZ. Sot pritet që të shqyrtohet dhe projekt-vendimi “Për regjistrimin si subjekt zgjedhor të 71 partive politike, për zgjedhjet për Kuvend të datës 23.06.2013.”, sipas listës së paraqitur në KQZ”.

Shkrimi u botua sot në gazetën Shqiptarja.com (print) 19.04.2013

Redaksia Online
(b.m/shqiptarja.com)

TAG:
• kqz