KQZ rrëzon kërkesën: Deputetit të
PS Vladimir Kosta s'i hiqet mandati

KQZ nuk ia ka hequr mandatin deputetit Vladimir Kosta dhe ka vendosur t’ia kthejë edhe një herë kërkesën Prokurorisë.
 
Nëpërmjet një njoftimi zyrtarë KQZ, shkruan se nuk shikon asnjë konflikt në mandatin e deputetit socialist të Përmetit, e për këtë arsye ai do të vazhdojë të mbetet i tillë, të paktën deri më 18 qershor.
 
Prokuroria ka kërkuar që Kostës t’i hiqet mandati i deputetit, pasi sipas saj nuk deklaroi në formular, dënimin e 17 viteve më parë.

Sipas kërkesës së akuzës depozituar në Komisionin Qendror të Zgjedhjeve, deputeti Kosta rezulton i dënuar në vitin 2000 për armëmbajtje pa leje me një gjobë prej 10.000 lekësh.

Grushte e armë ngjarja për të cilën u dënua Kosta
Grushte e deri në përdorimin e armës ka shkuar konflikti mes Vladimir Kostës kur ishte tregtar dhe një personi 17 vite më parë.

ReportTv zbardh ekskluzivisht dënimin e 17 viteve më parë dhënë nga Gjykata e Tiranës ndaj deputetit Vladimir Kosta, asokohe biznesmen.

Sipas vendimit rezulton se pas një konflikti fizik me shtetasin E.Topi për zënien e rrugës Kosta ka përdorur armën pa leje duke qëlluar në ajër dhe plumbi ka rënë mbi makinën e Topit.

Në gjykatë Kosta ka pranuar akuzën e prokurorisë, ndërsa ky dënim rezulton se nuk është pasqyruar në formularin e Dekriminalizimit.

Redaksia Online
(B.K/Shqiptarja.com)
 

TAG:
• kqz