KQZ tërheq shortin për subjektet politike në Graçanicë

/ATSH/.- Komisioni Qendror i Zgjedhjeve i Kosovës ka bërë sot tërheqjen e shortit për renditjen e subjekteve në fletëvotim për zgjedhjet e jashtëzakonshme për kryetar të komunës së Graçanicës. Renditja e partive u bë si në vijim: Progresivna Demokratska Stranka (PDS) me numrin 21, Lidhja Demokratike e Kosovës (LDK) me numrin 22, Nova Partija Kosova (NPK) me numrin 23 dhe G.I SRPSKa 24.

Valmir Elezi, zëdhënës për informim në KQZ, tha se "deri tani procesi ka shkuar sipas dinamikës së parashikuar dhe janë përmbushur disa prej detyrimeve kryesore".
"Përgatitjet për organizimin e këtyre zgjedhjeve janë duke shkuar sipas dinamikës së parashikuar me planin operacional të miratuar nga KQZ-ja. Vlen të përmendim se deri më tani janë përmbushur disa prej detyrimeve kryesore që dalin nga ky plan, siç janë: emërimi i Komisionit Komunal të Zgjedhjeve, Çertifikimi i subjekteve politike dhe kandidatëve pjesëmarrës, dhe është duke vazhduar puna në kryerjen e obligimeve tjera", theksoi ai.

Elezi theksoi rëndësinë që kanë subjektet politike për mbarëvajtjen e zgjedhjeve. Ai ftoi të gjitha subjektet politike që t'i përmbahen ligjit për zgjedhjet lokale dhe zgjedhjet e përgjithshme, si dhe rregullave zgjedhore në mënyrë që t'i kontribuojnë këtij procesi.

Në Komunën e Graçanicës më datë 18 janar 2015 do të votohet për kryetar të ri. Ish-kryetari i kësaj komune, Branimir Stojanoviç dha dorëheqjen nga ky post, pasi u bë zëvendëskryeministër i Kosovës./KosovaPress/

TAG:
• kqz