Kriminelët e kërkuar shqiptarë fshehen në veri

Enver Sekiraça i kërkuar për vrasjen e policit të njësisë speciale Triumf Riza në gusht të 2007-tës ishte strehuar për një kohë të gjatë në shtëpinë e Zvonko Veselinoviçit, i kërkuar për vrasjen e policit të ROSU gjatë ndërhyrjes në veri, Enver Zymberi.

Dy njerëzit e krimit, shqiptari e serbi, në veri të Kosovës vepronin pa asnjë pengesë falë policëve të korruptuar në krye me ish-komandantin e stacionit policor të veriut, Milija Milosheviç, thonë mediat e Kosovës.

Enver Sekiraça i kërkuar nga Interpoli ka qëndruar në shtëpinë e Veselinoviqit në Mitrovicë dhe në Serbi afër kufirit me Kosovës, derisa lëvizja e lirë i ishte kufizuar edhe nikoqirit të tij.

Atëherë, Sekiraça, i kërkuar për vrasjen e policit Triumf Riza, kishte arritur ilegalisht të shkonte në Republikën e Irlandës.

Zbulimi i vendit ku po fshihej, kishte rezultuar me nisjen e procedurave për ekstradimin e tij, të cilat mbetën në tentativë për shkak se ai është larguar në një vend që tash për tash nuk dihet se ku.

Më 12 nëntor të vitit të kaluar autoritetet irlandeze patën njoftuar ato kosovare se në shtetin verior evropian është arrestuar një person i quajtur Enver Sekiraça.

Enver Sekiraça (1973) i lindur në Prishtinë është shpallur person në kërkim që nga gushti i 2007-tës pas vrasjes së policit Trumf Riza.

/rg/shqiptarja.com/