SPAK hetoi Dvoranin se e kërkoi Meta, Kryemadhi-Ramës: Na vinin fotot e Dvoranit në Monaco, kur ai thoshte jam sëmurë! Zgjedhja e presidentit fasadë

Monika Kryemadhi tha për emisionin ‘Kontrast’ në Report TV se gjithmonë u ka hapur rrugën të tjerëve duke bërë kështu rolin e ‘pastrueses’. Lidhur me zgjedhjet e vitit 2011, ku Lulzim Basha u zgjodh kryebashkiak, Kryemadhi tha se kjo ndodhi pas insistimit të Metës dhe LSI-së mbi PD-në, që të kandidonte Basha. Pasi nëse Berisha nxirrte një kandidat tjetër, në garë do të përfshihej edhe ajo nën siglën e LSI.

“Unë në shumicën e karrierës time kam qenë pastruesja dhe kam hapur rrugën për shumë njerëz të tjerë për të ecur përpara, në kuptimin e mirë të fjalës. Ia kam hapur rrugën edhe Edi Ramës edhe Lulzim Bashës për kryetar bashkie të Tiranës në 2011. Se donin të tjerë nga PD në atë kohë të kandidonin dhe thamë atëherë po vejmë Monika Kryemadhin përballë Lulzim Bashës që të kandidojë. Dhe ka insistuar edhe Ilir Meta, edhe LSI-ja, që të kandidonte patjetër Basha. Se pa LSI-në nuk dilte Lulzim Basha kryetar bashkie. Edhe kur është bërë Edi Rama kryebashkiak, në vitin 2000, Ilir Meta e ka propozuar sepse Fatos Nano nuk e pranonte. Dëmi që Lulzim Basha dhe grupi i shtojzovalleve të veta që ndriçojnë vetëm një pjesë të errët të pyllit ku jeton ai, e dëmtuan LSI-në. Por kush i ka rënë në qafë LSI-së nuk e ka të gjatë shumë” – tha Kryemadhi për Report TV.

Pak ditë pasi kryeministri Rama kërkoi hetimin e Ilir Metës nga SPAK dhe mori në mbrojtje rastin e Ardian Dvoranit, ka ardhur edhe reagimi nga bashkëshortja e Presidentit. E ftuar në ‘Kontrast’ në Report TV, Monika Kryemadhi tha se Meta është i vetmi politikan që është përballur me drejtësinë në çdo qeverisje dhe i ka fituar të gjitha betejat.

“Deklarata e Ramës më bën të qesh sepse nëse ka një njeri që është përballur gjithmonë me drejtësinë, ai ka qenë Ilir Meta. Madje Ilir Metës iu hoq imuniteti që në vitin 1992 vetëm pse doli në mbrojtje të fabrikës së Poliçanit. Pastaj është përballja me Dritan Priftin. Meta është i vetmi deputet që është gjykuar në Themel dhe nuk i është shmangur procesit as me raporte mjekësore e as me imunitete.

Mos harroni që doli i pafajshëm 5 me 0 dhe relator ishte Ardian Dvorani. Ky thoshte jam sëmurë, dhe na sillnin fotografi ku ishte në Monaco. Shkuan deri atje sa kërkonin dëftesat e shokëve të Ilir Metës në gjimnazin në Lushnje.

Dy herë e çuan në Venecia, pastaj me Gjykatën Kushtetuese me falsifikimin që bëri Etilda Gjonaj…

Ilir Meta kishte të drejtë për djegien e mandateve dhe kur thoshte se me një kec si Lulzim Basha nuk e mundni dot hienën Edi Rama” – tha Kryemadhi për ‘Kontrast’.

Ky reagim vjen pas deklaratës së kryeministrit Edi Rama gjatë Asamblesë së PS, ku kritikat ndaj SPAK i përqendroi të Sali Berisha dhe Ilir Meta. Për Berishën, i kërkoi që të niste hetimet për shpalljen e tij 'Non Grata' nga SHBA-ja, teksa për Ardian Dvoranin tha se u hetua pasi kështu ka dashur presidenti.