Kuçi: Daçiç, s'ka nevojë të vijë
në Kosovë për zgjedhje

 PRISHTINE- Zëvendëskryeministri i Kosovës, Hajredin Kuçi, ka deklaruar se vizitat e zyrtarëve serbë në Kosovë në kohën e fushatës zgjedhore janë të panevojshme.

Kuçi ka thënë se vendimin që ka marrë në emër të Qeverisë së Kosovës, për të mos lejuar hyrjen e zyrtarëve të lartë serbë, mund ta shfuqizojë vetëm shefi i tij, Hashim Thaçi.

Duke e komentuar deklaratën e përfaqësuesit të Bashkimit Evropian në Kosovë, se ky vendim nuk ka qenë i mirë, Kuçi ka thënë se i respektojnë qëndrimet e zyrtarëve të BE-së, por vendimi është i shtetit sovran të Kosovës.

Në këtë intervistë për “Epokën e re”, Kuçi ka treguar se serbët mund të ftohen për zgjedhje edhe nga Beogradi.

“Do të jemi të gatshëm të lejojmë për vizitë ndonjë zyrtar serb që mund t’i ftojë serbët të dalin në zgjedhje, por kryeministri i Serbisë dhe zyrtarët e lartë nuk besoj se kanë nevojë të vijnë në Kosovë dhe t’i ftojnë serbët për zgjedhje”, ka thënë Kuçi.

“Ata mund t’i ftojnë serbët për pjesëmarrje në zgjedhje edhe nga Beogradi. Nëse qëllimi i tyre është ta mbështesin një parti, ata duhet ta bëjnë këtë në Serbi, e jo në Kosovë”, ka shtuar ai.

Ndryshe, para dy ditësh zyrtaret qeveritar kanë dhënë deklarata kontradiktore sa i përket vendimit për ndalimin e vizitave të zyertarëve serbe në kohë të fushatës zgjedhore.

Kështu, Këshilltari i Kryeministrit Thaçi, Bekim Çollaku ka deklaruar se nuk ka kurrfarë vendimi për ndalimin e vizitave të zyrtarëve serb.

“Ka pasur një keqkuptim. Nuk ka pasur ndalesë për vizitat e zyrtarëve serbë në Kosovë. Ka pasur vetëm një Jo për vizitën e Dacicit. Kjo është e tëra”, ka thënë Çollaku.

Pas kësaj, ka reaguar Serbia e cila ka ndërprerë bisedimet që po zhvillohen në Bruksel me arsyetimin se kjo është shkelje e marrëveshjeve të arritura me Prishtinën.

Por, duket se ky problem do të tejkalohet të hënën, kur Kryeministri i Kosovës dhe ai i Serbisë do të takoheni përsëri në Bruksel me ndërmjetësimin e Baroneshës Ashton, informon gazeta express.

Redaksia online
(sg/shqiptarja.com)