Kungulleshka të mbushura nga zonja Albana

Kungulleshka të mbushura

Përbërësit:

• 10 kunguj të vegjël të njomë
• 400 gr mish i grirë
• 3 qepë mesatare
• 2 filxhanë kafeje oriz
• 3 lugë supe gjalpë
• 1 lugë supe pure domate
• 1 lugë supe miell
• 1 kokërr vezë
• Kripë, piper i zi
• Bimë aromatike

Përgatitja:

Kungulleshkat pasi i lajmë, u presim anët, i kruajmë lehtë në sipërfaqe me anën e dhëmbëzuar të thikës dhe pastrojmë tulin e brendshëm për të vendosur mbushjen. I hedhim në enë me ujë dhe pastaj i kullojmë mirë. Përvëlojmë orizin në ujë të vluar dhe e kullojmë. Në një tigan kaurdisim qepët e grira imët me pak gjalpë së bashku me mishin e grirë. Pasi qepa ftohet hedhim orizin, vezën, majdanozin e grirë hollë, kripën, piperin. I përziejmë që të bëhet një masë me të cilën mbushim kungujt duke i mbyllur me kapakët e tyre. I skuqim lehtë me gjalpë nga të gjitha anët dhe i vendosim në tenxhere. Në po atë yndyrë skuqim lehtë miellin, shtojmë salcën, kripën, piperin. Kur merr valë e hedhim në tenxheren me kungujt. Mbulojmë tenxheren dhe i lëmë që të ziejnë 40-45 minuta ose mund t'i vendosim në furrë.

MC/Shqiptarja.com

TAG:
• zonjaalbana
• kungulleshka te mbushura
• gatime shtepie
• shije