Që Shqipëria është vendi më pro integrimit evropian nuk e rrëfejnë fjalët dhe fjalimet patetike të zyrtarëve tanë, ku Rama e ka intensifikuar gjuhën e komunikimit në funksion të idesë së përkatësisë sonë, njëjtësishëm me rrugën e vendeve të tjera ballkanike kah BE-së. Atë e tregojnë sondazhet në vite dhe një vokacion i madh i popullatës shqiptare në të gjitha shtresëzimet sociale të saj. Është kaq e theksuar kjo, saqë media e huaj, na e ka përmendur në aspektin grotesk të një lloj përpjekje identiteti, të cilit nuk i takojmë në përmasat që mendojmë dhe mëtojmë.
Për arsyen se nuk e kanë njohur regjimin komunist, por më shumë se kaq, atë lloj drejtimi historik të mbrapshtë që mori vendi dhe brenda kampit me të njëjtin kah ideologjik, organizmat dhe individët e ndryshëm të huaj e kanë të pamundur të kuptojnë këtë kërkesë, që tashmë është vërtetë përcaktimi i një nevoje identitare.
Por ndërsa në Forumin Strategjik të Bledit, Michel, kryetar i Këshillit Evropian, i bëri të ëndërrojnë dhe njëherë ballkanasit për integrimin në vitin 2030, pak orë më vonë presidentja e Komisionit Evropian Von der Leyen kujtoi se duheshin meritat e vendeve tona dhe qasjen e re, që vjen me Ukrainën dhe Moldavinë. Kjo na kthjelloi por edhe na kujtoi se fjalimi i saj nga specialistë u interpretua si një fjalim zgjedhor ose më shumë se kaq përgatitor për zgjedhjet e ardhshme në BE. Element, që nënkupton se pas zgjedhjeve, Ballkanin e presin sërish sfida por sidomos elementë të rinj retorike. Se do jetë apo jo Von der Leyen, kjo mbetet për t’u parë dhe pritur.
![](https://shqiptarja.com/template/img/NO_ALFA_Kuadrate shqiptarja.png)
Megjithatë, në këtë qasje të saj pati dhe elementë pozitivë: Ballkanasve i është kërkuar sundimi i ligjit, ku presidentja e KE-së e ka përcaktuar si element parësor. Dhe, jo më kot, ajo propozoi që vendet e Ballkanit, këtej e tutje, të përfshihen në Raportin Vjetor të Sundimit të Ligjit të BE-së, pothuaj njësoj si vendet anëtare. Një element vërtetë i vlefshëm. Ose të themi një element i mirë për studiuesit por jo për burokracitë tona dhe mbi të gjithë për nivelin e demokracisë tonë, që tashmë ngado në Ballkan, ashtu edhe tek ne, ka karakter autokratik. Vala e zgjerimit duket se do të na përmbledhë në burokraci më të mëdha, por një gjë kuptohet lehtë: qeveritarët tanë të tanishmit dhe ata pas tyre do të kenë mundësi shumë më të mëdha t’i justifikojnë qasjet e tyre, sepse tashmë janë të veshura me vello evropiane dhe me burokraci. Ndaj, fjala e Von der Leyen, ishte tërheqëse, ashtu si fjala e Michel për integrimin ballkanik, porse retorika zgjedhore e BE-së, duke dashur “të përfitonte” edhe nga Ballkani nuk është aq lajm i mirë. Të paktën për demokracitë tona, që janë nën petkun e dhimbshëm të forcimit të autokracisë.
![](https://shqiptarja.com/template/img/antipiracynote.jpg)
![](https://www.shqiptarja.com/template/img/sh_logo1.png)