Kryetari i Bashkisë së Tiranës, Erion Veliaj ka marrë një letër nga homologu i Stambollit, Ekrem Imamoglu, i burgosur që prej muajit mars të këtij viti për akuza që lidhen me korrupsionin dhe krimin e organizuar. Në letër, Imamoglu e uron Veliajn për fitoren që shënoi në Gjykatën Kushtetuese, e cila e riktheu në detyrën e kreut të Tiranës, duke e cilësuar si një hap inkurajues drejt rivendosjes së drejtësisë dhe demokracisë. 

“Dëshiroj t’ju përcjell urimet e mia më të ngrohta dhe më të përzemërta për këtë hap inkurajues dhe domethënës drejt rivendosjes së drejtësisë dhe demokracisë. E kuptoj se në këtë fazë mund të vazhdoni të përballeni me kufizime të lirisë suaj, dhe dua që ta dini se gjatë kësaj kohe jeni në mendimet e mia dhe keni gjithë solidaritetin tim.”, thuhet në letër.

Një vendim i tillë, thotë Imamoglu, nuk është vetëm personal por është një shenjë besimi në drejtësi që ndonëse mund të vonohet, nuk mund të mohohet. Imamoglu e vlerëson gjithashtu Veliajnpër përkushtimin e palëkundur ndaj shërbimit publik gjatë kohës që ka drejtuar bashkinë. Betejën e tyre, ai e cilëson si një luftë për demokraci jo vetëm në dy vendet respektive por kudo. 

“Si mbrojtës të demokracisë, përvojat tona të përbashkëta zbulojnë një të vërtetë që i tejkalon kufijtë. Lufta për demokraci në një vend është, në thelb, një luftë për demokraci kudo. Çdo qëndrim për drejtësi dhe çdo mbrojtje e sundimit të ligjit forcon përpjekjen e përbashkët që i lidh shoqëritë e lira dhe të drejta me njëra-tjetrën.“, shton ai.

Në fund, ai thotë se, me bindjen që do të dalin nga qelia, do të mund të takohen së shpejti.

“Me këtë rast domethënës, dëshiroj të shpreh solidaritetin tim më të thellë, admirimin dhe miqësinë time. Pres me padurim të takohemi sërish në një të ardhme të afërt si kolegë, miq dhe besimtarë të palëkundur në premtimin e demokracisë.”

Teksa ka ndarë letrën e plotë, Veliaj vlerëson fjalët mbështetëse që i ka dërguar homologu i tij.

Postimi i plotë i Veliajt: 

Të dashur miq,

Me mirënjohje të thellë për të gjitha letrat dhe fjalët mbështetëse që më keni dërguar e më dërgoni çdo ditë, e të cilat i çmoj pa masë, po publikoj edhe këtë letër inkurajuese nga miku im, kryetari i Bashkisë së Stambollit, Ekrem İmamoğlu, të cilin e falenderoj nga zemra.

I nderuar Kryetar i Bashkisë, miku im i dashur Erion,

Nga vendi ku ndodhem i ndaluar në burgun e Silivrisë në Stamboll, e prita me kënaqësi të thellë lajmin se Gjykata Kushtetuese e Shqipërisë jua riktheu mandatin e fituar në mënyrë demokratike të Kryebashkiakut të zgjedhur të Tiranës. Dëshiroj t’ju përcjell urimet e mia më të ngrohta dhe më të përzemërta për këtë hap inkurajues dhe domethënës drejt rivendosjes së drejtësisë dhe demokracisë. E kuptoj se në këtë fazë mund të vazhdoni të përballeni me kufizime të lirisë suaj, dhe dua që ta dini se gjatë kësaj kohe jeni në mendimet e mia dhe keni gjithë solidaritetin tim.

Ky vendim përfaqëson shumë më tepër se një çast lehtësimi personal. Ai qëndron si një shenjë e rëndësishme besimi në qeverisjen demokratike, sundimin e ligjit dhe vullnetin sovran të popullit të Tiranës. Në një kohë kur drejtësia dhe integriteti institucional po vihen në provë në shumë pjesë të botës, ky vendim rinovon bindjen se drejtësia, edhe kur vonohet, nuk mund të mohohet.

Forca juaj e qetë, qartësia morale dhe përkushtimi juaj i palëkundur ndaj shërbimit publik gjatë gjithë kësaj periudhe të vështirë, kanë qenë thellësisht frymëzuese. Nën drejtimin tuaj në Tiranë dhe përkushtimit në Rrjetin e Qyteteve Ballkanike B40, keni treguar se demokracia nuk mbahet vetëm nga institucionet, por nga ata që e mbrojnë atë me guxim, integritet dhe bindje.

Si mbrojtës të demokracisë, përvojat tona të përbashkëta zbulojnë një të vërtetë që i tejkalon kufijtë. Lufta për demokraci në një vend është, në thelb, një luftë për demokraci kudo. Çdo qëndrim për drejtësi dhe çdo mbrojtje e sundimit të ligjit forcon përpjekjen e përbashkët që i lidh shoqëritë e lira dhe të drejta me njëra-tjetrën.

Qëndrueshmëria juaj përballë sfidave vazhdon t’i frymëzojë ata që besojnë në demokraci dhe drejtësi. Rruga përpara mund të sjellë ende vështirësi, megjithatë shembulli juaj u jep forcë shumëkujt që mbeten të përkushtuar ndaj vlerave demokratike.

Me këtë rast domethënës, dëshiroj të shpreh solidaritetin tim më të thellë, admirimin dhe miqësinë time. Pres me padurim të takohemi sërish në një të ardhme të afërt si kolegë, miq dhe besimtarë të palëkundur në premtimin e demokracisë.

Me përshëndetje të ngrohta dhe respekt të palëkundur,

Ekrem İmamoğlu

Kryetar i zgjedhur i Bashkisë së Stambollit

Letra e Imamoglut për Veliajn 

Lajm ne perditesim...