FRANCË - Gjykata në Paris urdhëroi të martën Paris Saint Germain t'i paguajë Kylian Mbappesë 60 milionë euro si pagë dhe bonuse të papaguara, duke i dhënë fund një prej mosmarrëveshjeve më të ashpra në futbollin francez.

Vendimi erdhi pas muajsh debatesh ligjore pasi sulmuesi francez e paditi PSG- në në gjykatë për të ardhurat që ai tha se ishin mbajtur për prillin, majin dhe qershorin e vitit 2024, pak para se të largohej nga klubi për t'u bashkuar me Real Madridin si transferim i lirë.

"Jemi të kënaqur me vendimin. Kjo është ajo që mund të pritet kur pagat nuk paguhen", tha avokati i Mbappe, Frederique Cassereau. Gjykata vendosi që PSG nuk i kishte paguar Mbappesë tre muaj rrogë, një bonus etik dhe një bonus nënshkrimi që i takonte sipas kontratës së tij të punës.

Këto shuma u njohën si të detyrueshme nga dy vendime të Ligës Franceze të Futbollit Profesional (LFP) në shtator e tetor 2024 dhe gjyqtarët thanë se PSG nuk kishte paraqitur ndonjë marrëveshje me shkrim që tregonte se Mbappe kishte hequr dorë nga e drejta e tij.