Me votë unanime, Mirela Bogdani e vetme në garë zgjidhet drejtuese e KLP! Ja prioritetet

TIRANË- Mirela Bogdani është zgjedhur kryetarja e re e Këshillit të Lartë të Prokurorisë. Me votë unanime, 10 anëtarët e KLP votuan pro kandidaturës së Bogdanit, e cila ishte e vetme në garë për të zëvendësuar Alfred Ballën i përjashtuar 15 vite nga drejtësia.

Reforma në drejtësi dhe rritja e besimit të publikut në institucionet e drejtësisë, Bogdani tha se janë dy prioritete me qëllim rritjen e eficencës në sistemin e drejtësisë, pasi tashmë rruga e vendit drejt Bashkimit Europian është e pakthyeshme.

"Kandidimi vjen në kohën kur reforma në drejtësi ka krijuar shtratin e saj dhe tashmë synon rritjen e eficencës dhe konsolidimin e praktikave të mira të krijuara deri tani të të gjithë institucioneve të arkitekturës së re të sistemit të drejtësisë, në frymën e standarteve evropiane dhe atyre ndërkombëtare, me qëllim rritjen e besimit të publikut tek drejtësia dhe vijimin e pakthyeshëm të procesit të integrimit të vendit tonë në Bashkimin Evropian", tha Bogdani më mledhjen ku u konfirmua kryetare e re e KLP-së më 7 qershor 2024.

LEXO EDHE:
Sulmet e Berishës dhe Metës, KLP përgjigjet ashpër: Presioni ndaj SPAK, kërcënim serioz për drejtësinë! Kreu i PD s’tërhiqet: Bogdani, skllave e Dumanit

Bogdani tregoi ambicien për të rritur kapacitetet logjistike, për të reformuar sistemin gjyqësor dhe rritur bashkëpunimin me ndërkombëtarët.

“Për mua është tepër e rëndësishme puna me partnerët ndërkombëtarë, që kanë insistuar punën e Këshillit të Lartë të Prokurorisë dhe kanë vijuar mbështetjen. Do të vijoj punën me të gjitha institucionet e tjera të drejtësisë. Do të punoj për rregullimin e infrastrukturës të zyrave të KLP.

Prioritet për kryetaren e re të KLP-së do jetë edhe bashkëpunimi dhe koordinimi me institucionet e tjera të drejtësisë, Prokurorinë e Përgjithshme, KLGJ, Shkollën e Magjistraturës apo ILD. Bogdani u shpreh e gatshme që të mbështesë procesin për sistemin e integruar të menaxhimit të çështjeve për Prokurorinë e Përgjithshme. 

“Mbështetja e procesit për krijimin dhe vënien në funksionim sa më shpejt të sistemit të integruar të menaxhimit të çështjeve. Është kompetencë që lidhet më shumë me Prokurorinë e Përgjithshme, por do doja që Këshilli të ofrojë asistencën, sistem që regjistron çështjet penale deri në momentin që shkojnë në gjykatë. Është në proces dizenjimi i këtij programi, do ofroja mbështetjen maksimale”, vijoi Bogdani.

Duke pranuar se ka pasur pengesa, Bogdani tha se do të çokë para punën për procesin e vlerësimit etik dhe profesional të prokurorëve, një kërkesë nga BE, por sipas saj edhe një parakusht për zhvillimin e karrierës.

“Nxitja e procesit të vlerësimit etik dhe profesional të prokurorëve, i cili është iniciuar me miratimin e Regullores përkatëse, por që ka hasur në vështirësi të njohura tashmë nga të gjithë anëtarët. Synohet të bëhet një rishikim i rregullores për të vijuar me vlerësimin e prokurorëve, një kërkesë e BE dhe një parakusht për zhvillimin e karrierës së tyre, ka pasur pengesa, kërkon burime e njerëzore, kalkulim të mirë të të dhënave”, tha Bogdani.

Në fillim të mbledhjes fjalën e mori anëtarja Nurihan Seiti, një prej zërave që i doli në krah Alfred Ballës. Ndonëse vlerësoi figurën dhe eksperiencën e Bogdanit, Seiti tha se ky proces ngre pikëpyetje.

Edhe pse mendoj që Këshilli Duhet të jetë funksional në kuptimin e drejtimit dhe përfaqësimit, nuk është se është hera e parë që kalohet një periudhë kohë, kur mbaroi mandati i Brahimit dhe Balla ndejti si zëvendës, mori kohën e duhur për platformën dhe u bë mbledhja. Ajo që kam në qendër të vëmendjes për ti thënë këshillit dhe opinionit do këtë një pikëpyetje. Nga koha kur ndodhemi, duke para që ligji ka logjikën, kohën dhe zgjedhjen, mendoj që koha si një faktor për mua dhe zëvendësin Bazaj dhe tre anëtarët që prezumohet të vijnë së shpejti duket si një kohë negative. Duket sikur përjashtohemi nga kjo mundësi, mundësia i takon vetëm pjesës civile që vjen nga kuvendi.

Më 27 maj KLP konstatoi përfundimin e mandatit Alfred Ballës, i përjashtuar nga vettingu për 15 vite. Vendimi u mor me 9 vota pro dhe kundër vetëm të anëtares Nurihan Seitaj. Mbledhja e KLP-së u shoqërua me debate të forta.

Më 21 maj, KPA vendosi përjashtimin e tij me 15 vite nga sistemi i drejtësisë, duke rrëzuar një vendim të shkallës së parë, KPK, që e mbylli procesin e tij pa një vendim. Sipas vendimit të KPA, Balla s'ka të drejtë për t'u emëruar gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektor i Lartë i Drejtësisë ose Prokuror i Përgjithshëm, për një periudhë 15-vjeçare.

(Kliko këtu për të lexuar dokumentin e plotë) 

Rendit zhvillimet sipas orarit:

Të Fundit Të Parat

SI.E./Shqiptarja.com

TAG:
• alfred balla
• KLP
• mirela bogdani