Ekspozita që u çel për 100-vjetorin e themelimit të “Strehës së Parë Vorfnore Shqiptare” në lulishten e Presidencës do të vijojë të qëndrojë e hapur deri më 28 nëntor.

Ekspozita është ideuar dhe kuruar nga Ilir Çumani.

“Në fakt unë kamë afro tre vite që po merrem me projektin e 100-vjetorit të krijimit të Strehës së parë Vorfnore. Një histori pak e njohur për shumicën e shqiptarëve, ndoshta edhe për studiues të fushës apo historianë, të cilët kanë se ç’të mësojnë e të gërmojnë në gjithë këtë përpjekje të humanizmit shqiptarë, e cila shtrihet në pesë etapa të ekzistencës së historisë së strehës së parë Vorfnore”, tha Çumani.

Në mjediset e Presidencës janë ekspozuar foto të rralla.

Në këtë foto është Duçja që i ka çuar jetimët shqiptarë me anije në Romë për të festuar triumfin e fashizmit në Shqipëri.

Në një tjetër foto, në një situatë të re historike, sheh fëmijët e një revolucionari afrikan që u strehuan në Shqipëri në vitet ’70 për të shpëtuar jetën.

Më tej janë personalitetet shqiptare që u rritën jetim dhe ata që u rritën në shtëpinë e fëmijës.

Streha e parë vorfënore u themelua në rrugën e Kavajës më 28 nëntor të 1917-s me ideimin e Rauf Ficos, asokohe nënprefekt i Tiranës. Në këtë ekspozitë gjendet letra për drejtorin e përgjithshëm të kryqit të kuq shqiptar, Haxhi Shkoza, i cili i kërkonte Ficos të dhënat për iniciativën e ngritjes se Strehës.

Zyber Hallulli me dëshirën e tij, para se të vdiste i ka dhuruar “Strehës Vorfnore” të gjithë pasurinë e tij personale. Në vitin 1994, streha ka marrë emrin e tij.

Ekspozita “Rrugëtimi i Humanizmit Shqiptar në 100 vite” do të jetë e hapur për publikun nga ora 10:00-14:00.

[gallery]24905[/gallery]

Redaksia Online
J.Sh Shqiptarja.com