“Le Villi”, shfaqet në Tiranë
drama e parë e Puccini-t 

TIRANE - “Le Villi”, vepra e parë e Giacomo Puccinit, e shkruar kur ishte 23 vjeç, do të shfaqet premierë në Teatrin Kombëtar të Operës dhe Baletit më 20 dhe 22 qershor. Nën dirigjimin e Danila Candiotto-s, dirigjimin e korit nga Dritan Lumshi, regjinë e Ada Gurrës dhe me artistët Etleva Golemi e Ramona Tullumani(në rolin e Anës), Ernisto Grisales (në rolin e Robertos), Ylber Gjinit e Armando Likaj(në rolin e Gulielmos, etj, do të interpretohet opera me 2 akte në 1 orë e 15 minuta.

Dje në një konferencë për mediat artistët dhe stafi realizues janë shprehur optimistë në impaktin që do të ketë vepra. Danila Candiotto, e cila do të dirigjojë për herë të parë veprën, tha se, “të qenit dirigjente femër në Tiranë, s’më solli problem siç mendoja. E krahasoj me vëndin tim, Italinë, ku mbizotëron një frymë maskiliste”. Pas shumë vlerësimeve për orkestrën e TKOB dirigjentja italiane e ka mbyllur fjalën e saj me këtë shprehje: “Jam befasuar, nuk prisja një kulturë të thellë muzikore në Shqipëri”.

Eva Golemi, një ndër solistet e shfaqjes tha se “përralla” e Giacomo Puccinit e ka emocionuar. Ernisto Grisales u shpreh se “kemi punuar fort me produksionin, dhe me pjesën tjetër të stafit, dhe besoj se do të lëmë një gjurmë me kryeveprën e Puccinit në Tiranë”.

Baritoni Armando Likaj vlerësoi muzikën e kompozitorit të madh, duke shprehur se kjo opera ka një muzikë, që të sfidon emocionalisht. “Sdfida ime në këtë rol ishte mposhtja e emocioneve që më dhuronte muzika e tij” u shpreh Likaj. Ramona Tullumani ka kuruar çdo personazh në detaje dhe mendon se vepra e Puccinit përmban historinë e muzikën më të bukur të krijuar ndonjëherë.

Opera “Le Villi” mbështetet në historinë e një krijese mitike që i përket folklorit të Europës Qëndrore. Simbolizon shpirtra të vajzave të cilat kanë humbur dashurinë e tyre dhe enden mes tokës dhe qiellit pa mundur të gjejnë qetësi.

Redaksia Online
(e.c/shqiptarja.com)