“Rrëfenjëza” nga bota mistike
në 9 tablo të Lekës

Motivi i legjendës së Ikarus-it, mëndjemadhësia e sfiduesit që nuk ndjek këshillat e të atit dhe përfundon duke gjetur vdekjen, është në qendër të ekspozitës së Gazmend Lekës në galerinë Zeta.

9 tablo ku përshkruhen shtatë fazat e jetës së njeriut, duke marrë numrin shtatë të ditëve të javës nga e hëna në të dielë, kanë në sfondin e tyre objektin e fluturimit, avionin.

Duke “ngatërruar” botën mistike mes qiellit dhe tokës, mes të shkuarës dhe teknologjisë së sotme, piktori i quan tablotë në këtë ekspozitë të tij si një cikël “aksidentesh ajrore”.

Rrënimi apo rrëzimi i këtij objekti gjigant është përfytyruar nga piktori Leka si fluturimet e ethshme të njerëzimit, që një ditë marrin fund me aksidente tragjike, të cilat nisin që nga ëndrra sfiduese për të ngritur “Kulla e Babelit” deri tek fluturimet ajrore, detare dhe kozmike.

Patosi për qiellin është shoqëruar me admirimin dhe makthin e aksidenteve, që pasqyrohet nëpërmjet ngjyrës së bardhë, grisë dhe të zezës tipike të piktorit Gazmend Leka.
“Por Ikarusi u mbush me entuziazëm më të madh nga mundësia që iu dha për të fluturuar dhe e harroi paralajmërimin e të atit.

Pendët u çngjitën dhe ai ra në det e gjeti vdekjen”, shkruhet në enciklopedinë greke të mitologjisë, të cilën piktori Leka e kishte vendosur në hyrje të ekspozitës.

Ai kujton legjendën e Ikarusit, ndërsa shpjegon pikturat e tij, që donte të fluturonte drejt diellit, por më tej në tablotë e tij krahët prej puplash zogu të Ikarusit i ka zëvendësuar me krahët e çeliktë të avionit, duke treguar përmes pikturës tragjedinë që ka shoqëruar njerëzimin që nga kohët antike e deri më sot. Redaksia Online (m.z/shqiptarja.com)