Lefterie Lleshi në krye të KQZ
opozita nuk voton në Kuvend

TIRANE- Për herë të parë Komisioni Qendror i Zgjedhjeve do të drejtohet nga një grua. Kuvendi zgjodhi sot me 73 vota pro Lefterije Lleshin si kryetare e Komisionit Qendror të Zgjedhjeve. Deputetët socialistë nuk votuan në këtë votim të fshehtë.

Lefterie Lleshi është këshilltarja juridike e kryetares së Kuvendit Jozefina Topalli. Përveç faktit që Lleshi është punonjëse e Administratës së Kuvendit si dhe anëtare në KLD-së ajo për 8 vite ka qenë dhe punonjëse në Shërbimin Informativ Kombëtar.

“Është civilizim që në krye të institucionit kemi një zonjë, si e refuzuat dhe e humbët këtë rast, e kam për zonjat”- tha kryetarja e Parlamentit duke iu drejtuar deputeteve femra të opozitës. Kuvendi votoi dhe emrat e anëtarëve të tjerë të KQZ-së.

Kuvendi miratoi dhe anëtarët e KQZ-së.
Deputetët miratuan dhe 6 anëtarët e rinj të KQZ-së. Kështu Partia Demokratike do të përfaqësohet sërish në këtë institucion me Hysen Osmanaj dhe Vera Shtjefni, të cilët pas votimit të fshehtë morën secili nga 119 vota. Edhe kandidaturat e propozura nga Partia Socialiste, përkatësisht Alban Shtylla dhe Denar Biba morën respektivisht nga 127 dhe 129 vota. Ndërsa përfaqësuesit e partive të vogla në KQZ Ilirjan Muho, i Lëvizjes Socialiste për Integrim (LSI) mori 90 vota, ndërsa Jano Jani i Partisë Bashkimi për të Drejtat e Njeriut 127 vota.

BERISHA: RISTANIN DO TA KEM NE KRAH NE BETEJAT E ARDHSHME
Kryeministri Berisha duke falënderuar ish kreun e KQZ-së Arben Ristani paralajmëroi se ai do të mbetet një bashkëpunëtor i ngushtë i tij.
“Dua të garantoj Ristanin se është nder e kënaqësi të vazhdoj bashkëpunimin me të dhe të theksoj se ka pasur mirëkuptimin tim të plotë kur vendosi të mos kandidojë për kreun e KQZ për faktin se ishte i pari kryetari i KQZ që zgjidhet me konsensus. Mos u bëni merak se në krah timin do ta keni në të gjitha betejat e ardhshme e të rëndësishme. Po ia bëj falenderimin se po shkëputet nga një detyrë shtetërore që e kreu me dinjitet të madh e po largohet për shkakun e vetëm se ju e prishët konsensusin."- tha Berisha.
(sg/shqiptarja.com)

TAG:
• kqz