Lejuan ndërtime pa leje, në pranga Kryeinspektori dhe inspektori i IMT-së Himarë, në kërkim 2 inspektorë të tjerë

Kryeinspektori dhe një inspektor i Inspektoratit të Mbrojtjes së Territorit (IMT) në Himarë kanë rënë në prangat e policisë ditën e sotme, si dhe janë shpallur në kërkim dy inspektorë të tjerë, të akuzuar për shpërdorim detyre.

Me një njoftim për mediat, Policia bën me dije se dyshohet se këta persona, në bashkëpunim me njëri -tjetrin kanë shpërdoruar detyrën, duke lejuar ndërtimin e paligjshëm të disa objekteve në territorin e Bashkisë Himarë.

Kanë rënë pranga personi me inicialet R. H., 35 vjeç, banues në Himarë, me detyrë kryeinspektor pranë Inspektoratit të Mbrojtjes së Territorit të Bashkisë Himarë dhe 30-vjeçari me inicialet  E. Z., 30 vjeç, banues në Himarë, me detyrë inspektor pranë Inspektoratit të Mbrojtjes së Territorit të Bashkisë Himarë.

Ndërkohë janë shpallur në kërkim M. N., 36 vjeç banues në Sarandë dhe Dh. B., 53 vjeç, banues në Himarë, të dy me detyrë inspektor pranë Inspektoratit të Mbrojtjes së Territorit të Bashkisë Himarë.

Nëpërmjet një njoftimi, Prokuroria Vlorë bën me dije se këta persona, në një periudhë kohore prej 2 vitesh, në mënyrë të përsëritur kanë lejuar që në zonën e bregdetit nga Dhërmiu deri në Borsh, të Bashkisë Himarë, të ndërtohen objekte pa lejen e Bashkisë Himarë, kryesisht shtesa në kate dhe ndërtime të reja.

Disa prej këtyre objekteve janë evidentuar nga policia, por sërish nga ana e IMT Himarë nuk është marrë asnjë masë për konstatimin dhe pezullimin e punimeve

Gjithashtu, këta punonjës edhe pse janë vënë në dijeni të konstatimit nga ana e policisë së këtyre objekteve të ndërtuara pa leje i kanë lejuar pronarët e tyre të vazhdojnë dhe përfundojnë ndërtimet duke mos marrë asnjë masë për të ndërprerë ndërtimin informal të tyre.

TAG:
• himare
• Arrestime
• ndertime pa leje
• IMT