POGRADEC - “Kuteli, kalvari i një jete plot brenga”, libri i biografit Tomi Mato, është një përbaltje e figurës së, Mitrush Kutelit.
 
Kështu e kanë cilësuar familjarët e të madhit Dhimitër Pasko (Mitrush Kuteli) veprën e Matos, për të cilën kanë bërë edhe një padi në gjykatën e Pogradecit.
 
Në seancën e sotme avokati i familjes Pasko ka paraqitur  fakte dhe argumente, që siç thotë ai përbaltin figuren e Kutelit nga autori.
 
Në të njëjtën linjë me avokatin është edhe vajza e Mitrush Kutelit, Atalanta Pasko.
 
“Ai na ka futur në trillimin e tij komplet familjen, në role dhe situata që i ka trilluar ai vet, që marrin pikënisje nga emri ynë, por që nuk kanë asgjë të përbashkët me mënyrën si si zhvilloheshin ngjarjet në shtëpinë tonë”, shprehet vajza e Kutelit, Atalanta Pasko.

Ndërkaq, Tomi Mato, thotë se është njeri i afërt me familjen e Kutelit dhe libri është i bazuar mbi të vërteta të familjes së tij
 
“Mitrush Kutelin e kam krushk. Fatkeqësia është që si avokati dhe zonja që përfaqëson akuzën nuk e kanë kuptuar librin”, -thotë autori i librit Mato.

Aktualisht libri i Tomi Matos, është i bllokuar nga gjykata,  ndërsa po vijon të zhvillohet një proces gjyqësor, ndërsa familja e Kutelit kërkon si dëmshpërblim 2.5 milionë lekë të vjetra.

Redaksia Online
(Gre.M/Shqiptarja.com)