POP 5

Lajmet më të lexuara të 5 minutave të fundit

Ekonomi

Linja e interkonjeksionit me
Kosovën OST: Tender i dytë

Operatori i Sistemit të Transmetimit (OST) ka njoftuar bankën shtetërore gjermane KfW se, pavarësisht nga paralajmërimet e kësaj të fundit, ka vendosur të përsëritë tenderin për ndërtimin e linjës së interkonjeksionit Shqipëri-Kosovë.
Linja e interkonjeksionit me <br />Kosovën OST: Tender i dytë
TIRANE- Qeveria shqiptare ka vendosur zyrtarisht të anulojë tenderin për linjën e interkonjeksionit Shqipëri-Kosovë. Operatori i Sistemit të Transmetimit ka njoftuar bankën financuese gjermane KfW - institucion qeveritar - si financuese e projektit, se pala shqiptare ka vendosur anulimin e tenderit dhe ribërjen e tij. Më parë, në një letër të dërguar në shtator, banka gjermane, ndonëse rikëshillonte qeverinë të mos e anulonte tenderin, e kishte paralajmëruar atë që, në rast ritenderimi, duhet t'u përmbahej tre kushteve të panegociueshme për të mos humbur financimin.

Sipas letrës, KfW do të vazhdojë financimin e projektit nëse tenderi i ri do të ndahet në dy pjesë të veçanta, mes Shqipërisë dhe Kosovës. Po kështu, një tjetër kusht i vendosur nga KfW është ruajtja e standardeve të larta teknike si kritere në tender, ndërsa kushti i fundit është ai që pala shqiptare të pranojë rezultatin e tenderit, cilido qoftë ai, për të shmangur një ngërç të dytë.

Pala shqiptare, nga ana e saj, njofton zyrtarisht bankën gjermane për anulimin e tenderit dhe vendimin e ribërjes së tij. Në letër, kreu i OST Arben Ibroja premton se institucioni që ai drejton do t'i përmbushë tre kushtet e vendosura nga KfW, por nuk garanton se të njëjtën gjë do e bëjë edhe ministria shqiptare e Financave. "Duke mbajtur parasysh komunikimet me ministrinë e Financave, na lejoni t'ju informojmë se kjo ministri nuk mund të përfshihet si palë në procesin e ritenderimit", thuhet në letrën që OST i dërgon bankës gjermane.

Ndërkohë, opozita edhe një herë, me këtë rast, e ka konsideruar si jo të rastësishëm anulimin e tenderit për linjën me Kosovën, duke akuzuar qeverinë se po shkel interesat kombëtare. "Në ditën kur Berisha derdhte lot patriotizmi në Kosovë, ish-bodigardi i tij Arben Ibroja, drejtor i OST-të në Shqipëri, i kërkonte bankës gjermane anulimin e tenderit për ndërtimin e linjës 400 kilovolt mes Shqipërisë dhe Kosovës", deklaroi deputeti socialist Artan Gaçe. Sipas tij, zvarritja e ndërtimit të linjës po bëhet me qëllim për të ruajtur monopolet serbe në energji.

"Eshtë shumë e qartë ajo që ne kemi thënë që në fillim: zvarritja dhe anulimi i këtij tenderi kanë si qëllim të vetëm mosbërjen e kësaj linje, për të mbajtur të varur, si Shqipërinë, po ashtu edhe Kosovën, nga linjat e transmetimit të serbëve, me të cilat aktualisht funksionon gjithë rrjeti energjetik shqiptar", tha Gaçe.
Tenderi për linjën në fakt është zhvilluar që në mars të vitit të kaluar, ku fituese rezultoi kompania kroate Dalekovod. Por qeveria shqiptare e bllokoi shpalljen e fituesit, duke tentuar të zëvendësonte ofertën më të mirë me atë që doli në vend të dytë, për shkak se ofronte një çmim më të ulët. Kjo nuk u pranua nga banka gjermane për shkak të cënimit të standardeve teknike - që vlerësoheshin me jo pak, por tri të katërtat e pikëve - dhe që nga ajo kohë projekti është në ngërç, duke e lënë edhe Kosovën pa këtë linjë tepër të rëndësishme furnizimi.
(Shkrimi u publikua sot ne gazeten Shqiptarja.com)

(sg/shqiptarja.com)

  • Sondazhi i ditës:
    25 Nëntor, 08:30

    Takimet jashtë, mendoni se diaspora do marrë pjesë masivisht në votime?

Lajme të tjera



×

Lajmi i fundit

Cilat janë pengesat për arritjen e armëpushimit mes Izraelit dhe Hezbollahut?

Cilat janë pengesat për arritjen e armëpushimit mes Izraelit dhe Hezbollahut?

25 Nëntor, 22:54