Listat, Gjiknuri: S’do të lejojmë
manovra ilegale në këto zgjedhje

TIRANË – Deputeti Damian Gjiknuri nga selia e PS-së tha sot se realiteti me listat e zgjedhëve, që paraqiti dje zv.ministri i Brendshëm Poni, tregon dështimin e procesit të përgatisjes së listave të zgjedhjeve.

"Dje dëgjuam ekspozenë e statistikave të listës zgjedhore të Ministrisë së Brendshme nëpërmjet gojës së Zv/ministrit Ferdinand Poni", - tha Gjiknuri.-" Për vërtetësinë finale të tyre, ne do të presim raportin e auditit të KQZ, i cili pritet të dalë këto ditë, por nuk mund të lëmë pa përmendur disa çështje serioze të njohura publikisht që fatkeqësisht nuk i dëgjuam në sqarimin e zotit Poni.

Së pari, asnjë sqarim nuk dëgjuam në lidhje me punën që ka bërë Ministria e Brendshme në lidhje me 65 mijë të dhëna të dyshuara si të dubluara, të konstatuara nga auiditi i KQZ dhe të përcjella zyrtarisht Ministrisë së Brendshme;

së dyti, me shqetësim konstatojmë se njoftimi i zgjedhësve për qendrën e votimit, një detyrim i Kodit Zgjedhor, nuk është zbatuar megjithëse sipas ligjit kjo gjë duhet të ishte kryer tashmë. Përgjegjësia për këtë bie mbi qeverinë dhe konkretisht Ministrinë e Zotit Poni, pasi ndryshimet në programin kompjuterik të Gjendjes Civile nuk e mundësojnë këtë funksion për njësite vendore dhe asnjë fond nuk i është vënë në dispozicion njësive të pushtetit vendor për këtë pushtet të deleguar nga qeveria qendrore;

së treti numri i zgjedhësve pa adrese të saktë zgjedhore është afërsisht gjysmë milion duke shkelur haptazi rekomandimin e ODHIR pas zgjedhjeve të vitit 2011 që u kërkon autoriteteve shqiptare “të rrisin transparencën dhe saktësinë e listave të zgjedhësve".

"Partia Socialiste dhe auditi i propozuar nga opozita në KQZ, po e monitoron nga afër të gjithë procesin e përgatitjes së listës zgjedhore si një nga proceset më të rëndësishme dhe të diskutueshme në të kaluarën. U bëjmë apel të gjithë qytetarëve", - përfundoi Gjiknuri,-"që për çdo problem të drejtohen në zyrat e PS-së, pasi PS-ja ka ngritur strukura në nivel qëndror dhe lokal për verifikimin e tyre. Refuzimi i transparencës dhe mosreagimi me të metat serioze të paraqitura nga ne, hedhin hije të forta dyshimi në vullnetin e qeverisë dhe përmbushjen e këtij detyrimi".

Kësaj radhe", - tha ai - "s'do të lejojmë manovër ilegale që të tjetërsojë vullnetin popullor në zgjedhjet e 23 qershorit".

Redaksia online
(ar.sh/shqiptarja.com)

TAG:
• kqz