Liz Truss punon për zgjidhjen e krizës së energjisë në Britani, shqyrton reformën në tregje për të ulur faturat

Mbretëria e Bashkuar ka të ngjarë të bëjë një reformë në tregjet e energjisë, duke u marrë me çështjen e fitimeve të mëdha që disa kompani energjetike po bëjnë, mëson BBC. Sipas strukturës aktuale të tregut, çmimi i paguar për disa prej tyre shpesh përcaktohet nga gjeneruesi i kostos më të lartë në treg, që aktualisht është gazi.

Qeveria planifikon të kërkojë nga gjeneruesit e burimeve të rinovueshme dhe ato bërthamore që të nënshkruajnë kontrata të reja 10 ose 15-vjeçare me çmime fikse shumë më poshtë se tarifat aktuale.

Kryeministrja e re Liz Truss është e bindur se nuk do të vendosë ndonjë taksë të papritur për kompanitë e energjisë, por do t'i duhet të trajtojë çështjen e fitimeve të tyre të mëdha.

Konsulenca e tregut të energjisë Cornwall Insight vlerëson se çmimet e energjisë ka të ngjarë të jenë më shumë se 40 miliardë paund më të larta, për shkak të faktit se disa gjeneratorë të energjisë elektrike paguhen bazuar në çmimin jashtëzakonisht të fryrë të gazit.

Kjo është një çështje për t’u trajtuar me ngut, në kohën kur qeveria po planifikon të shpenzojë dhjetëra miliarda paund nga paratë e taksapaguesve për të subvencionuar faturat e energjisë së vendit.

Pagimi i kompanive të energjisë së rinovueshme më pak se çmimi i tregut për gazin do të nënkuptonte një ulje shumë të ndjeshme të të ardhurave për to, të paktën në periudhën afatmesme.

Megjithatë, RenewableUK, organi i industrisë që përfaqëson shumicën e kompanive të energjisë së prodhuar nga era në këtë grup, e pranoi këtë qasje në parim.

"Ne jemi të etur për të punuar në bashkëpunim me qeverinë" për këtë çështje, tha CEO i RenewableUK, Dan McGrail.

“Nuk ka kuptim të lejohet që kostoja tepër e shtrenjtë e gazit të vendosë çmimin për të gjithë tregun e energjisë elektrike”, tha ai.

RenewableUK përfaqëson shumicën e bizneseve më të mëdha të energjisë së rinovueshme në MB, duke përfshirë Orsted, Scottish Power, SSE, RWE dhe EDF.

Pra, pse mund ta pranojnë këtë goditje të madhe potenciale ndaj fitimeve? RenewableUK thotë se kjo është për shkak se kompanitë e kuptojnë se nuk është e drejtë që konsumatorët të përballen me çmime kaq të larta në një kohë krize kombëtare.

Sekretari i ndryshimeve klimatike në hije, Ed Miliband, tha të enjten në programin Today të BBC Radio 4 se kontrata të tilla afatgjata me çmim fiks do të kishin efektin e sigurimit të fitimeve të mëdha për kompanitë e energjisë elektrike për vitet në vijim.

Liz Truss mund të jetë ideologjikisht kundër vendosjes së taksave të papritura, por pagimi i miliarda paund i kompanive private në fitime të tepërta nga kuleta publike është gjithashtu një detyrim politik.

D.GJ/Shqiptarja.com

TAG:
• mbreteri e bashkuar
• Liz Truss
• energji elektrike