Edi Rama ka shumë kohë që është më shumë në ajër sesa në tokë. Më shumë në avion se në makinë dhe më shumë në makinë se në këmbë. I shijon më tepër të bëjë batuta për atletet e tij të bardha sesa të merret me ujërat e zeza në bregdet dhe qyngjet e partisë së tij që derdhin urrejtje reciproke, por që ai vetë refuzon t’i shohë. Kritikët dhe mbështetësit e tij pretendojnë se Rama ka filluar të shohë gjithmonë e më larg, por nuk dallon çfarë i ndodh përpara syve. Ai vetë refuzon edhe inatin e të parëve dhe nuk duket i interesuar për servilizmin e të dytëve. I përkedhelet sedra që e konsiderojnë të paparashikueshëm, por vetë sedra nuk e le të shpjegojë se kërkojnë të gjejnë përgjigje aty ku ai vetë nuk ka fshehur gjë. E gjëmojnë pas detajeve, por ai thelbin e ka kyçur gjetkë.
I dashur dhe i urryer si vetëm tre apo katër shqiptarë të tjerë në këto njëqind e kusur vjet të ekzistencës së shtetit shqiptar, Rama ka luksin të argëtohet me frymëmbajtjen deri në mbytje me të cilën ndëshkon miqtë dhe kundërshtarët. Çdo të bëjë në kongres, çdo të bëjë në asamble, kush ikën, kush vjen, kush ngrihet, kush bie, kush ka ftesë për në kopshtin e frutave dhe kujt do t’i radiografohet stomaku për fruta të ngrëna?
Të gjitha këto janë vetëm detaje. Janë thërrimet që ushqejnë kureshtjen e përditshme dhe urinë e shqiptarëve për të parë ndryshimin që nuk ndryshon asgjë. Janë pjesëza të kanavacës, ndërkohë që vetë piktura është krejt tjetër.
“Shqipëria është atdhe i Njëshit, Fisit dhe Prijësit!”, thoshte dikur privatisht Sali Berisha. Pavarësisht se Kushtetuta sot thotë ndryshe, Shqipëria është gati njëlloj me kohën kur Ahmet Zogu, i shtoi një numër mbiemrit dhe u shndërrua në Lartmadhëri. Eshtë e tillë jo vetëm për shkak të traditës, siç e ka provuar dikur vetë Berisha, paraardhësit e tij, por dhe pasardhësi në pushtet Edi Rama. Dhe kjo ndoshta është dilema më e madhe e vetë Edi Ramës. Të ndryshojë traditën e ta përshtasë atë me kushtetutën apo të ndryshojë kushtetutën që ta bëjë paralele me traditën?
I shndërruar në sfinks të heshtur, me humor të palexueshëm dhe gjithmonë e më i vetmuar, llogaria e ftohtë e Ramës ka të bëjnë gjithmonë e më pak me të përditshmen e lajmeve të portaleve. Ajo i drejtohet kryesisht një të nesërmeje të lidhur me trashëgiminë e tij dhe me çfarë do të shkruhet në libra. Dhe për këtë, ashtu si gjithë politikanët seriozë, edhe ai i nënshtrohet një rregulli të ashpër: pak rëndësi ka si vjen në skenë dhe çfarë bën; rëndësi ka si ikën! Dhe Rama nuk ka ndërmend të ulë perden e tij, siç urojnë edhe miqtë që i shtyp si armiq, edhe kundërshtarët e tij që nuk e mundin dot.
Me të gjitha gjasat, me një palë zgjedhje formale vitin tjetër dhe me një shumicë të garantuar afër shumicës kushtetuese, Rama do të inicojë një reformë përfshirëse kushtetuese. Një reformë që synimin kryesor e ka në kontrollin dhe ekuilibrin e pushteteve, që sot realisht është një frymë e deformuar dhe ndoshta deri në ndryshimin e natyrës së republikës. Shqipëria ka vite që nuk është më republikë parlamentare. Parlamenti është nën kontrollin e kryeministrit, siç ndodhi në kohën e Berishës dhe siç po ndodh sot me Ramën. Ai është shnderruar prej kohesh ne një noter here te zhurmshëm e herë naiv, por gjithëherë pa këllqe që të rrëzojë vullnetin e kryeministrave. Sepse Shqipëria është realisht republikë kryeministrore.
Ky ndryshim do të ishte pa dyshim operacioni më i rëndësishëm politik që do të duhej të bëhej: Shqipëria me president të zgjedhur nga populli, që emëron dhe shkarkon kryeministrin dhe mandat të kufizuar me jo më shumë se dy herë zgjedhje. Jo si modeli amerikan, por si modele shumë më pranë Shqipërisë. Si ati Erdogan në Turqi apo vëllau Vuçiç në Serbi që e kanë bërë më herët kapërcimin nga kryeministra në presidentë.
Natyrisht Edi Rama nuk e ka ndarë me askënd këtë projekt e ndoshta ai nuk ekziston as në planet e tij. Por mundësitë që ky operacion kushtetues hap për gjithë shoqërinë apo dhe mëkimi i interesit të tij personal, mund ta lejojnë lehtësisht kryeministrin të persiatet mbi këtë udhë. Parë në këtë dritë, makthi “kush ikën e kush vjen” i socialistëve në asamblenë e të dielës dhe kureshtja e publikut, ka të bëjë vetëm me ca pak fate individësh, ndryshimi i të cilëve, nuk sjell asnjë ndryshim. Lëvizjet e mundshme në qeveri me ndoshta më shumë se tre ministra që mund të ikin, përkëmbimet e drejtuesve politikë në qarqe, ndarja e Tiranës qytet e qark apo ikje-ardhjet e disa emrave e deri dhe ndryshimi pothuaj total i listës së deputetëve nesër, janë vetëm detaje portalesh, por jo tekë e librit që synon të shkruajë Rama. Ato janë ditar betejash të përditshme vaniteti, por jo lufta finale për të!
Kryeministri nuk ka sot në krah pothuajse asnjë nga njerëzit me të cilët nisi të qeverisë Shqipërinë në 2013-ën. Një pjesë e miqve të dikurshëm i janë shndërruar në armiqtë e tij më të egër, një pjesë shohin makthe për të ardhmen për ato që kanë bërë në të shkuarën e një pjesë kanë patur fatin e gjurmës së pulës në shkretëtirë: lagën e thanë, erdhën e ikën, por gjë nuk bënë!
Edi Rama sot ka bastin për të zgjidhur aksiomën e djeshme të Sali Berishës: “Shqipëria është Atdhe i Njëshit, Fisit dhe Prijësit!”. Dhe mund ta zgjidhë këtë aksiomë qoftë duke i shërbyer Atdheut që ka nevojë për një Prijës të përkohshëm kur nuk e mundin dot ndryshe, qoftë duke i blatuar vetes një dhuratë që në një të nesërme më të largët, do t’i vlejë shumë më shumë! Jo vetëm për të shpëlarë shijen e helmët që jep mërzia nga pushteti i gjatë, jo vetëm për t’i shkarë ngutit për të hapur qyngjet socialiste të bllokuara me urrejtje reciproke, por dhe për të shuar helmin e vetmisë së vetëkërkuar duke ndenjur më pak në tokë sesa në ajër! Aty nga ku kundron plot pezm sesi “miqtë” e rinj pa thelb e kockë, rendin mbas detajeve mishtore dhe i brohorasin atletet për t’u dukur të dobishëm për Fisin në sytë e Njëshit dhe Prijësit.
Komente
Lajme të tjera
-
'Çifti nga qyteti' që zgjodhën për të investuar në Zhulat të Gjirokastrës, Rama: 'Paketa e Maleve', mbështetje për turizmin
23 Nëntor, 09:49 -
'Gati shqipe', turi me diasporën, Rama nesër takim me shqiptarët e Londrës! Pamje nga salla
23 Nëntor, 07:32 -
Rama njofton takimin me Diasporën të dielën në Londër: Radha me shqiptarët e Britanisë së Madhe, në rrugën drejt Shqipërisë 2030!
22 Nëntor, 18:09 -
Komisioni Evropian mirëpret përfshirjen e Shqipërisë në zonën unike Euro (SEPA): Një hap përpara në integrimin drejt BE!
22 Nëntor, 16:44 -
Akademia Politike e PS-së, Rama: Më shumë të rinj që duan të angazhohen
22 Nëntor, 13:32 -
Reagimet e politikës për Ditën e Alfabetit! Rama: Gjuhën ta duam e përcjellim! Begaj: Simbol i bashkimit kombëtar! Basha: Prioritet për emigrantët
22 Nëntor, 08:56 -
Dita Kombëtare e Alfabeti/ Publikohet drafti i fjalorit të Gjuhës Shqipe, 120 mijë fjalë! Gjinushi: U morën 25 hartues
22 Nëntor, 08:01 -
Vrasja e 14 vjeçarit pranë shkollës 'Fan Noli', qytetarët pro nismës së mbylljes së TikTok dhe Snapchat
21 Nëntor, 18:10 -
Shqipëria pjesë e sistemit unik europian të pagesave! Rama: Hap i madh drejt BE-së në 2030! Nga 2025 dërgesat e parave nga Europa e anasjelltas pa kosto financiare
21 Nëntor, 16:58 -
‘Alarmi’ për votën e emigrantëve, KQZ garanton: S’ka dështim! Ose ndërrojmë Kodin, ose paguajmë shtrenjtë! Votimi e numërimi elektronik 18.2 mln euro vetëm për Tiranën
21 Nëntor, 12:25 -
Kuvendi Kombëtar i Gjuhës, Emil Lafe: Duhet mbrojtje ligjore! Nesër publikohet drafti për Fjalorin e madh të Shqipes
21 Nëntor, 12:03
-
Nesër publikohet drafti i fjalorit të madh të Gjuhës Shqipe, Rama: E hedhim në konsultim publik! Të mbrojmë shqipen nga barbarët e rrjeteve sociale
21 Nëntor, 10:58
Lorenc pse kaq naiv. Vertet mendon qe rama do balancim pushtetesh ?? Eshte absorde te mendosh qe nje njeri ka 12 vjet pushtet absolut do bej reforme per te kufizuar veten nga pushteti. Po ta donte kete gje kishte lene pushtetin dhe te ndodhte rotacioni politik si ne te gjithe vendet demokratike. Diktoret nuk limitojne veten nga pushteti mos u bej niv.
Përgjigju@Dakort E drejte eshte dhe konstatimi yt. Paradoksi me i madh sot ne Shqiperi eshte se Nqs banda e Berishes eshte akoma gjalle atehere Rama duhet te mbaj pushtetin. Dhe nqs banda e Berishes zhduket atehere Rama duhet ta mbaje pushtetit sepse ska njeri tjeter kush te qeverisi. E verteta e 3 mandateve eshte qe pushteti korrupton dhe pushteti absolut korrupton absolutisht!!!
Dmth ti pretendon që Rama ta kërë pushtetin për hir të rotacionit!!!??? Po atëhere të mos bëjmë fare zgjedhje. Këta zotërinjtë politikanë të hedhin short me zare për rradhën e qeverisjes apo jo?? Ka 1 arsye dhe vetëm 1 përse PS do rrijë në pushtet dhe kjo është: SALIU DHE BANDA E TIJ JANË GJALLË.