Lufta e Putinit nuk është me Ukrainën, por me qytetërimin dhe rregullat e tij

Eshtë një kohë kur banorët e Tokës mbushin sheshet e qyteteve të tyre për Paqen. Eshtë një kohë kur banorët e planetit të mrekullueshëm Tokë, prej vitesh tashmë nuk iu përgjigjen thirrjeve për dhunë të individëve të prapambetur.

E keni vënë re? Individë të dhunshëm, të kombësive të ndryshme, të ngritur në majat e pushtetit përmes 1001 hileve shpesh po mobilizojnë pakica të prapambetura të sulmojnë me shigjeta, qysqi, armë, gurë, varre, tanke, bomba, Parlamente, Kongrese, seli qeverish, qytete, civilë. Por ata mbeten përherë vetëm. Pas Trump në Amerikë, pa përmendur qesharakët e të eturit tanë për dhunë, Putin është shprehja më e lartë e keqdashësisë. Putin po vret civilë në Ukrainë, po lë fëmijë të sëmurë pa kurim, të moshuar të kyçur nëpër bunkerë. Putin është përfaqësuesi më ekstrem i të çmendurve që po guxojnë të shkelin vijën e kuqe: Po godet civilizimin e mundimshëm të arritur në një Botë të lodhur nga luftërat.

Qytetërimi, civilizimi është armiku më i madh i këtyre individëve, është makthi i tyre dhe halli më i madh i Putinit. Kush ka dhunën brenda nuk pëlqen rregullat, nuk pëlqen demokracinë, nuk pëlqen institucionet, pasi në kokën e tyre ata mendojnë se janë vetë gjithçka dhe të gjithë. Ukraina, presidenti Zelensky, janë thjeshtë një rezistencë e qytetërimit ndaj egos së stërmadhe të një njeriu që mbart sot, në të gjithë botoksin e përthitur, mbeturinat e personazheve më të frikshëm dhe të paskrupujt që njerëzimi ka njohur.

Putin nuk i ka shpallur luftë Ukrainës, por qytetërimit. I keni venë re sa të ngjashëm janë mes tyre këta të çmendur? Kanë një të përbashkët të dallueshme: Janë të pandjeshëm. Kanë humbur njerëzoren, por njerëzorja do t’i përmbysë pasi është një forcë e paimagjinueshme që lind e perëndon vetëm me Diellin. Dhe Dielli, as do t’ja dijë për Putinin.

a.m./r.k./Shqiptarja.com

TAG:
• Zelensky
• ukraina
• Putin