Lufta/ SHBA nis sulmet në Siri e Irak, godet objektivat e grupeve militare! Biden: Hakmarrja për vrasjen e 3 ushtarëve amerikanë do vazhdojë (VIDEO)

Bombarduesi supersonikë B-1

Bombardueset supersonike B-1 u ngritën nga bazat e tyre në SHBA për të nisur sulmin kundër milicisë pro iraniane dhe bazave të Gardës Revolucionare në Irak dhe Siri.Konfirmim I fuqisë së reagimit të urdhëruar nga Presidenti Biden, për sulmin që vrau tre ushtarë amerikanë në Jordani, dhe që cilësohet si më i madhi që nga operacionet e vitit 2011 në Libi.

Një paralajmërim i qartë për Teheranin, i cili deri më tani nuk është goditur në territorin e tij, për vendosmërinë e Uashingtonit për të ndaluar ndërhyrjet e ajatollahëve për të përhapur luftën e vazhdueshme në Gaza në të gjithë Lindjen e Mesme dhe më gjerë.

Sipas informacioneve të publikuara nga Komanda Qendrore, janë goditur mbi 85 objektiva, duke përdorur më shumë se 125 bomba precize. Në shënjestër u vunë qendrat e komandës dhe kontrollit, qendrat e inteligjencës, depot e raketave dhe dronëve dhe shumë objekte të tjera.

Sulmet nuk ishin në territorin iranian, por goditën bazat e Pasdaranit jashtë vendit. Duke gjykuar nga objektivat e targetuara, qëllimi ishte shkatërrimi i strukturave në vend të eliminimit të personelit ushtarak. Milicitë pro-iraniane po shënjestrojnë forcat amerikane në të gjithë Lindjen e Mesme që nga fillimi i luftës në Gaza. Ndërsa fundjavën e kaluar filluan sulmin e tyre më të rëndë, duke goditur një bazë në Jordaninë veriore.

Tre ushtarë amerikanë u vranë në sulmin me dron. Trupat e tyre u pritën nga Presidenti Biden në bazën Dover në Delaëare. Në të njëjtën kohë, Pentagoni dha ​përgjigjen që kreu i Shtëpisë së Bardhë kishte paralajmëruar tashmë ditët e fundit, duke thënë se i kishte miratuar objektivat. Nuk mund të mos i përgjigjeshin vdekjes së tre ushtarëve amerikanë, por mbi të gjitha përshkallëzimit nga Teherani, edhe nëse në përgjigje të kërcënimeve të tij, milicia e Katib Hezbollahut kishte deklaruar se donte të pezullonte operacionet e saj kundër amerikanëve.

Dy ditë më parë zëdhënësi i Shtëpisë së Bardhë tha se përgjigja do të vijë në faza të ndryshme dhe mund të zgjasë për një periudhë të gjatë, ndaj ka të ngjarë që të mos jetë një operacion i izoluar. Uashingtoni ka thënë se nuk dëshiron ta zgjerojë luftën ndaj Iranit dhe për këtë arsye ka qenë i kujdesshëm që të mos godasë drejtpërdrejt Republikën Islamike brenda kufijve të saj, por nëse mesazhi nuk merret, Pentagoni është i gatshëm të përshpejtojë dhe intensifikojë kundërpërgjigjet. Në fakt, vetë presidenti paralajmëroi: “Përgjigja jonë filloi sot. Do të vazhdojë në vendet dhe kohët që ne zgjedhim. Ne nuk po kërkojmë konflikt, në Lindjen e Mesme apo gjetkë në botë. Por nëse lëndoni një amerikan, ne do të përgjigjemi”.

Administrata e SHBA-së deklaroi se kishte lajmëruar qeverinë e Bagdadit përpara sulmit ajror në territorin e saj, deklaroi këshilltari për sigurinë kombëtare John Kirby.

Por nga ana tjetër qeveria e Bagdadit e ka quajtur sulmin amerikan si ‘dhunim të sovranitetit. Është ‘një kërcënim që mund të sjellë konseguenca të rënda në Irak dhe në rajon” thuhet në deklaratën e qeverisë irakene.

Edhe media shtetërore siriane akuzoi SHBA-në për "agresion" për sulmet, të cilat ata thonë se kishin në shënjestër zonat e shkretëtirës së Sirisë dhe ato përreth kufirit Sirian-Irak, "duke shkaktuar vdekje dhe lëndime të shumta". Raporton Al Jazeera dhe Times of Izraeli.

SHBA nis sulmin ndaj objektivave të grupeve paraushtarake në Siri dhe në Irak. Në rrjetin social X vijnë dhe pamjet e para të sulmeve amerikane në perëndim të Irakut afër kufirit me Sirinë. Sipas zyrtarëve amerikanë janë goditur 85 objektiva.

Presidenti Biden duke pritur trupat e ushtarakëve të vrarë amerikanë (2 shkurt 2024)

Presidenti i SHBA-së  Joe Biden deklaroi: Hakmarrja jonë filloi sot e do të vijojë në kohën dhe në vendet që do të vendosim ne”.

Presidenti amerikan përsëriti se "Shtetet e Bashkuara nuk duan konflikt në Lindjen e Mesme apo kudo tjetër në botë".

Por ai lëshoi ​​gjithashtu një paralajmërim: "Të gjithë ata që duan të na lëndojnë duhet të dinë: Nëse lëndoni një amerikan, ne do të hakmerremi".

Hakmarrja jonë filloi sot dhe do të vazhdojë në kohën dhe vendet që ne vendosim”. Presidenti amerikan përsëriti se "Shtetet e Bashkuara nuk duan konflikt në Lindjen e Mesme apo kudo tjetër në botë".

Shtetet e Bashkuara të Amerikës kanë filluar një valë sulmesh ajrore në Irak dhe Siri.

Sulmet vijnë si përgjigje ndaj sulmit me dron të bërë në bazën ushtarake amerikane në Jordani, ku mbetën të vrarë tre trupa amerikanë dhe u plagosën rreth 40 të tjerë, të dielën.

Goditjet fillestare u kryen ndaj selisë së komandës dhe kontrollit, depove me municione dhe objekte të tjera.

Shtetet e Bashkuara fajësuan për sulmin Rezistencën Islamike në Irak, një koalicion i milicive të mbështetur nga Irani.

Grupet e milicisë të mbështetur nga Irani në të gjithë rajonin e kanë përdorur konfliktin midis Izraelit dhe Hamasit për të justifikuar goditjen e objekteve amerikane të paktën 166 herë.