Lufta/ Trump: Anijet të tregojnë guxim dhe të kalojnë Ngushticën e Hormuzit! Qeveria italiane mohon lajmin e Financial Times për dialog me Iranin! NATO rrëzon një raketë iraniane në hapësirën turke

Departamenti Amerikan i Shtetit njoftoi të premten një shpërblim prej 10 milionë dollarësh për informacion në lidhje me vendndodhjen e udhëheqësit të ri suprem të Iranit, Mojtaba Khamenei.

Programi i ‘Shpërblimeve për Drejtësi’ i Departamentit vendosi një shpërblim për 10 nga udhëheqësit më të lartë të mbetur të Iranit, përfshirë Khamenein dhe Ali Larijani, sekretarin e Këshillit Suprem të Sigurisë Kombëtare të Iranit dhe zyrtarin më të lartë të sigurisë së vendit.

“Këta individë komandojnë dhe drejtojnë elementë të ndryshëm të Korpusit të Gardës Revolucionare Islamike të Iranit, i cili planifikon, organizon dhe ekzekuton terrorizëm në të gjithë botën”, deklaroi Departamenti.

Programi ‘Shpërblime për Drejtësi’ ka ofruar më parë shpërblime për terroristë si ish-udhëheqësit e al-Kaedës, Osama bin Laden dhe Ayman al-Zawahiri. Presidenti sirian Ahmed al-Sharaa ishte subjekt i një shpërblimi prej 10 milionë dollarësh sipas programit deri në ndryshimin e vendimit në vitin 2024.

Pesë nga personat e emëruar të premten janë të listuar sipas titujve të tyre, pa emër apo fotografi, duke përfshirë "sekretarin e këshillit të mbrojtjes" dhe "komandantin e IRGC-së".

Shtetet e Bashkuara dhe Izraeli kanë vrarë shumë nga udhëheqësit më të lartë të Iranit, përfshirë ish-komandantin e IRGC-së, Mohammad Pakpour, dhe Ajatollah Ali Khamenei-n, ish-udhëheqësin suprem dhe babain e Mojtabas.

Hezbollahu po përgatitet për "një përballje të gjatë" me Izraelin dhe parashikon fitoren. Kështu ka lajmëruar udhëheqësi i kësaj organizate Naim Kassem.

"Izraelitët nuk kanë mjetet për të arritur qëllimet e tyre. I them Katzit: nëse doni të bashkoheni, vazhdoni, por nuk do të keni mjetet për të ruajtur pozicionin tuaj në terren", paralajmëroi Naim Kassem ministrin izraelit të Mbrojtjes.

Deklaratat e liderit të Hezbollahut erdhën pasi ministri izraelit i Mbrojtjes tha se Libani do të paguajë "një çmim gjithnjë e më të lartë për vonesën e tij në çarmatosjen e Hezbollahut, me humbje territoriale dhe dëmtime në infrastrukturën e tij".

Udhëheqësi i Hezbollahut tha gjithashtu se luftëtarët e kësaj organizate janë të motivuar për të luftuar dhe nuk kanë frikë nga vdekja.

"Ne po përgatitemi për një përballje të gjatë dhe do të fitojmë. Luftëtarët e rezistencës islamike janë shumë të motivuar dhe nuk kanë frikë nga vdekja; ata janë gati për luftime", siguroi udhëheqësi i Hezbollahut.

Pentagoni po dërgon më shumë marinsa dhe anije luftarake në Lindjen e Mesme, pas shtimit të sulmeve iraniane në Ngushticën e Hormuzit. Lajmin e raporton Uoll Street Journal, duke cituar tre zyrtarë amerikanë.

Sekretari amerikan i Mbrojtjes, Pete Hegseth, ka miratuar një kërkesë nga Shtabi Qëndror amerikan, përgjegjës për forcat amerikane në Lindjen e Mesme, për të dërguar një grup të quajtur “amfib” të gatshëm për veprim dhe një njësi ekspeditare të marinsave të lidhur me të.

Sipas zyrtarëve, kjo njësi zakonisht përbëhet nga disa anije luftarake dhe rreth 5.000 marinsa. Anija luftarake USS Tripoli, e vendosur në Japoni, dhe marinsat që i janë caktuar asaj, janë nisur drejt Lindjes së Mesme, thanë dy nga zyrtarët.

Ata shtuan se marinsat janë tashmë të pranishëm në rajon për të mbështetur operacionin kundër Iranit. Sipas ABC Neës, që citon dy burime zyrtare amerikane, një njësi e marinsave amerikanë e vendosur në tre anije sulmi amfib është dërguar tashmë në Lindjen e Mesme. ABC konfirmon se kjo njësi, e cila ndodhej në Japoni, është transferuar në rajon në kuadër të luftës me Iranin.

Që nga fillimi i konfliktit në Lindjen e Mesme, i shpërthyer pas sulmit të Shteteve të Bashkuara dhe Izraelit ndaj Iranit, vetëm 77 anije kanë kaluar përmes Ngushticës së Hormuzit. Kryesisht bëhet fjalë për anije që i përkasin të ashtuquajturës “flotë fantazmë”.

Këtë e pohon kompania e të dhënave detare Lloyd's List Intelligence.
“Ne kemi regjistruar 77 kalime që nga fillimi i muajit përmes ngushticës, të cilën Rojet e Revolucionit iranian duan ta mbajnë të mbyllur,” theksoi Bridget Diakun, analiste e Lloyd's List Intelligence.

Për krahasim, midis 1 dhe 11 marsit 2025 ishin regjistruar 1.229 kalime në këtë ngushticë, thekson kjo kompani e të dhënave e lidhur me revistën e specializuar detare Lloyd’s List.

Qeveria italiane ka mohuar raportin e publikuar nga Financial Times se Roma, së bashku me Parisin, ka hapur kanale dialogu me Iranin, për të garantuar qarkullimin e lirë detar në Ngushticën e Hormuzit.

Kur u kontaktuan nga Corriere Della Sera, të dy burimet në Palazzo Chigi dhe Ministria e Jashtme italiane mohuan kategorikisht se kanë pasur ndonjë kontakt me autoritetet iraniane.

Ata theksojnë se raportet e publikuara, janë "të pavërteta".

Ministri britanik i Mbrojtjes, John Healey, ka deklaruar se dyshon se pas taktikave luftarake iraniane si dhe pas potencialit të tyre ushtarak fshihet ‘dora’ e Presidentit të Rusisë, Vladimir Putin.

"Nuk do të habiste askënd të mendonte se dora e fshehtë e Putinit fshihet pas disa taktikave iraniane dhe potencialisht edhe pas disa prej aftësive të tyre", tha Ministri Britanik i Mbrojtjes, John Healey, duke ringjallur dyshimet se Rusia po bashkëpunon ushtarakisht me Teheranin, veçanërisht në përdorimin e dronëve, në konfliktin kundër Shteteve të Bashkuara dhe Izraelit.

"I vetmi udhëheqës botëror që përfiton nga rritja marramendëse e çmimeve të naftës tani është Putini", shtoi ministri gjatë një vizite në selinë britanike në Northwood, pranë Londrës.

Healey më pas deklaroi se zyrtarët e Mbrojtjes po analizojnë dronin e prodhuar në Iran që goditi bazën RAF në Akrotiri të Qipros më 1 mars, duke kërkuar "çdo provë të komponentëve rusë ose të tjerë të huaj".

Foto: Pete Hegseth

Sekretari i Mbrojtjes i SHBA-së, Pete Hegseth, tha sot në një konferencë për shtyp se udhëheqësi i ri suprem i Iranit, Mojtaba Khamenei, është “plagosur dhe me shumë gjasa është shpërfytyruar”.

“Udhëheqja e Iranit nuk është në një gjendje më të mirë, ata fshihen, struken, kjo është ajo që bëjnë minjtë. Ne e dimë që udhëheqësi i ri i ashtuquajtur jo aq suprem është i plagosur dhe ka të ngjarë të jetë shpërfytyruar", tha Pete Hegseth.

Sekretari i mbrojtjes hodhi dyshime mbi mesazhin e parë të supozuar të udhëheqësit të ri iranian, i cili u lexua në televizionin shtetëror.

“Ai bëri ​​një deklaratë dje, në fakt një deklaratë të dobët, por nuk kishte as zë dhe as video”, tha Hegseth.

Ai shtoi: “Irani ka shumë kamera dhe shumë regjistrues zëri, pse një deklaratë me shkrim? Mendoj se e dini pse. Babai i tij, i vdekur. Ai është i frikësuar, është i plagosur, është në arrati dhe i mungon legjitimiteti. Është një rrëmujë për ta.”

Foto: Flamuri i BE-së

BE ka reaguar pasi Shtetet e Bashkuara kanë autorizuar vendet të blejnë naftë ruse që janë aktualisht të ngarkuara në anije në det.

Antonio Costa, Presidenti i Këshillit Evropian përmes një postimi në rrjetet sociale theksoi se ky është një vendim shqetësues, pasi ndikon në sigurinë evropiane.

 “Vendimi i njëanshëm i SHBA-së për të hequr sanksionet mbi eksportet e naftës ruse është thellësisht shqetësues, pasi ndikon në sigurinë evropiane. Rritja e presionit ekonomik mbi Rusinë është thelbësore që ajo të bjerë dakord për negociata serioze për një paqe të drejtë dhe të qëndrueshme. Dobësimi i sanksioneve rrit burimet në dispozicion të Rusisë për të zhvilluar një luftë agresioni kundër Ukrainës”, shkroi Presidenti i Këshillit Evropian Antonio Costa në X.

Foto: Friedrich Merz

Kancelari gjerman Friedrich Merz kritikoi autorizimin e përkohshëm të Shteteve të Bashkuara për të blerë naftë ruse.

"Ne mendojmë se është gabim të lehtësohen sanksionet tani, për çfarëdo arsye", tha Merz.

 Berlini, shtoi ai, "nuk do të lejojë që Ukraina të preket nga lufta në Iran".

Qendra e Komandës amerikane (CENTCOM) kanë konfirmuar vdekjen e gjashtë anëtarëve të ekuipazhit të avionit cisternë amerikan KC-135 që u rrëzua mbrëmjen e së enjtes në perëndim të Irakut.

“Më 12 mars, rreth orës 14:00 sipas orës së Bregut Lindor të SHBA-së, një avion furnizimi KC-135 i ushtrisë amerikane u rrëzua në Irakun perëndimor. Gjashtë anëtarët e ekuipazhit janë konfirmuar të vdekur, ndërsa përpjekjet e kërkim-shpëtimit vazhdojnë. Rrethanat e incidentit janë nën hetim. Megjithatë, humbja e avionit nuk është shkaktuar nga zjarr armik apo zjarr miqësor. Identitetet e anëtarëve të ekuipazhit nuk do të bëhen publike përpara se të kalojnë 24 orë nga njoftimi i familjarëve të tyre”, thuhet në njoftimin zyrtar.

Një raketë balistike e lëshuar nga Irani hyri sot në hapësirën ajrore të Turqisë dhe u rrëzua nga sistemet e mbrojtjes ajrore të NATO-s.

Lajmin e bëri Ministria e Mbrojtjes, teksa kjo është raketa e tretë e kapur mbi hapësirën turke brenda pak ditësh

Foto: Donald Trump

Presidenti i SHBA-së, Donald Trump, citohet tu ketë thënë udhëheqësve të G7 se Irani "është afër dorëzimit", raporton Axios, duke cituar tre zyrtarë të lartë.

Gjatë një bisede, e cila u zhvillua të mërkurën në mëngjes, Trump pretendoi suksesin e Operacionit Epic Fury, duke pretenduar se ai kishte "eliminuar një kancer që na kërcënonte të gjithëve".

Ndërsa pohoi se Irani është "pranë dorëzimit", presidenti i SHBA-së shtoi se aktualisht nuk ka asnjë udhëheqës në Teheran me autoritetin për të marrë një vendim të tillë.

"Askush nuk e di kush është udhëheqësi, kështu që nuk ka askush që mund të njoftojë dorëzimin".

Të njëjtët zyrtarë e përshkruan Trumpin si "të paqartë" në lidhje me kohën dhe objektivat e operacionit ushtarak.

Një seri shpërthimesh të fuqishme tronditën Teheranin këtë mëngjes, në ditën e katërmbëdhjetë të luftës së nisur nga Shtetet e Bashkuara dhe Izraeli.

Sipas ushtrisë izraelite, sulmet kanë në shënjestër infrastrukturën e regjimit iranian në kryeqytetin iranian.

“IDF sapo ka filluar një valë të gjerë sulmesh që synojnë infrastrukturën e regjimit terrorist iranian në të gjithë Teheranin”, thuhet në deklaratën e ushtrisë.

Një avion amerikan "KC-135" që përdoret për furnizim me karburant është rrëzuar në Irakun perëndimor.

Komanda Qendrore e SHBA-ve bën me dije se incidenti nuk ka lidhje zjarrin armiqësor të krijuar në rajon, ndërkohë që po vijojnë operacionet e kërkim-shpëtimit, për pesë ushtarët që ndodheshin në bord.

Foto: Donald Trump

Presidenti i Shteteve të Bashkuara të Amerikës, Donald Trump, ka bërë një postim në rrjetin social Truth Social, ku paralajmëron për një veprim të mundshëm të madh kundër Iranit.

Trump përdor një gjuhë të ashpër ndaj regjimit iranian dhe bën thirrje që të ndiqen zhvillimet që pritet të ndodhin gjatë ditës.

“Shikoni çfarë do të ndodhë sot me këta të çmendur. Ata kanë vrarë njerëz të pafajshëm në mbarë botën për 47 vjet dhe tani unë, si Presidenti i 47-të i Shteteve të Bashkuara të Amerikës, po i vras ata. Çfarë nderi i madh është ta bëj këtë”, shkruan Trump në postimin e tij.

Ai shton gjithashtu se, sipas tij, Shtetet e Bashkuara po shkatërrojnë plotësisht regjimin iranian në disa drejtime.

“Po shkatërrojmë plotësisht regjimin terrorist të Iranit, ushtarakisht, ekonomikisht dhe në çdo mënyrë tjetër”, thekson ai.

Foto: Donald Trump

Duke komentuar mbi shëndetin e Udhëheqësit të ri Suprem të Iranit, Mojtaba Khamenei, Presidenti Donald Trump tha se ai ishte "plagosur, por është gjallë".

"Është plagosur, por mendoj se ndoshta është gjallë në një farë mënyre", tha Trump gjatë një interviste.

Mojtaba Khamenei i cili mbeti i plagosur në sulmin amerikano-izraelit të 28 shkurtit, - nuk është shfaqur në publik që nga fillimi i luftës.

Foto: Emmanuel Macron

Presidenti francez Emmanuel Macron njoftoi se një ushtar u vra "gjatë një sulmi" në rajonin e Erbilit të Kurdistanit irakian, teksa gjashtë të tjerë u plagosën.

"Marshali Arnaud Frion i Batalionit të 7-të vdiq për Francën gjatë një sulmi në rajonin e Erbilit", shkroi ai, duke shtuar se "lufta në Iran nuk mund të justifikojë sulme të tilla".