Lufta Rusi-Ukrainë/ 5 orë takim në Berlin mes Zelenskyt dhe Witkoff për planin e paqes, nesër raundi i dytë

Bisedimet mes Volodymyr Zelenskyt dhe emisarëve të Donald Trump-it, Steve Witkoff dhe Jared Kushner, së bashku me kancelarin gjerman Friedrich Merz, u mbyllën sot pas më shumë se pesë orësh diskutimesh dhe do të vijojnë nesër. Këtë e bëri të ditur këshilltari i presidentit ukrainas, Dmytro Lytvyn. “Është vendosur të vazhdohet nesër”, tha ai, duke sqaruar se Zelensky do të shprehet lidhur me këtë çështje nesër.

Ukraina është gati të heqë dorë nga përpjekja e saj për anëtarësim në NATO në këmbim të garancive të sigurisë nga Shtetet e Bashkuara dhe Evropa, deklaroi këtë dielë presidenti ukrainas Volodymir Zelensky, një qëndrim që duket se synon të avancojë bisedimet e paqes të planifikuara për të këtë të dielë në Berlin, me të dërguarin amerikan Steve Witkoff.

Sipas Financial Times, Zelensky i ka deklaruar gazetarëve në një bisedë video në WhatsApp se “po flasim për garanci dypalëshe sigurie midis Ukrainës dhe Shteteve të Bashkuara, domethënë, garanci sipas Nenit 5... si dhe garanci sigurie për ne nga partnerët tanë evropianë dhe vende të tjera si Kanadaja, Japonia dhe të tjera". Neni 5 i Traktatit të Natos, parashikon se “një sulm ushtarak ndaj një ose më shumë vendeve anëtare” të Aleancës “do të konsiderohet si një sulm drejtuar të gjithë vendeve” pjesë e Natos.

Vendimi për të dërguar Witkoff-in nënvizon përpjekjet e shtuara për për të ngushtuar dallimet midis Kievit dhe Uashingtonit mbi kushtet e marrëveshjes.

"Sot në Berlin është dita ukraino-amerikane”, deklaroi presidenti Zelensky duke folur për mediat. Ai bëri të ditur se do të ketë një takim veçmas dhe me kancelarin Merz, e ndoshta dhe me disa nga udhëheqësit evropianë më vonë këtë mbrëmje.

Moska do të kundërshtojë me vendosmëri përfshirjen e propozimeve të zhvilluara nga Kievi dhe Brukseli në planin e paqes, tha këshilltari i Kremlinit, Yuri Ushakov, i cituar nga Tass. Duke folur për gazetarin televiziv Pavel Zarubin, Ushakov theksoi se Moska ende nuk i ka shqyrtuar propozimet.

"Megjithatë, ne do t'i kundërshtojmë ato me vendosmëri nëse bëhen ndryshimet e nevojshme. Ne e kemi bërë qëndrimin tonë shumë të qartë dhe amerikanët duket se e kanë kuptuar atë", tha ai. 

"Rusia synon të zgjerojë prodhimin serik të raketës balistike me rreze të mesme veprimi Oreshnik dhe po vlerëson opsionet për modernizimin e saj për të përmirësuar aftësinë goditëse të kokës së saj bërthamore", tha kreu i Shërbimit të Inteligjencës së Jashtme të Ukrainës, Oleh Ivashchenko, në komentet e cituara nga Ukrinform , duke u kërkuar shërbimeve perëndimore të monitorojnë këtë zhvillim dhe aftësinë bërthamore në rritje të Rusisë.

Shefi i inteligjencës theksoi se programi merr fonde prioritare nga Fondi Kombëtar Rus, duke pasur parasysh gjithashtu rëndësinë strategjike të raketës Oreshnik për kompleksin ushtarako-industrial të vendit.

Sipas Ivashchenkos, mbi 50 kompani ruse janë të përfshira në prodhimin serik të raketës, duke përfshirë organizata të mëdha kërkimore dhe prodhuese si Instituti i Kërkimeve Shkencore të Instrumenteve të Komandës, Instituti Qendror i Kërkimeve të Makinerive të Ndërtimit të Anijeve, Fabrika e Prodhimit të Instrumenteve Kaskad Krasnodar, Fabrika e Prodhimit të Instrumenteve Kalugapribor, Fabrika Elektromekanike Kaluga, Fabrika Priboy, Instituti i Kërkimeve Soliton dhe Instituti i Kërkimeve Sinvent të Sistemeve Teknike.

Ivashchenko vuri në dukje se raketa Oreshnik, e cila u përdor disa herë me koka luftarake konvencionale gjatë konfliktit për të goditur qytetet ukrainase, është në thelb një version i modernizuar i RS-24 Yars, zhvillimi i së cilës filloi në fillim të viteve 2000. Dallimi kryesor qëndron në dizajn: Oreshnik ka dy faza në vend të tre, gjë që përmirëson efikasitetin dhe manovrimin gjatë lëshimit.

Presidenti ukrainas Volodymyr Zelensky konfirmoi takimet e tij të ardhshme me përfaqësuesit e Presidentit të SHBA-së Donald Trump për t'i dhënë fund luftës.

"Ne po përgatitemi për takime me palën amerikane dhe miqtë tanë evropianë në ditët në vijim. Berlini do të presë shumë ngjarje", tha ai në fjalimin e tij televiziv në mbrëmje, të cituar nga Ukrainska Pravda.

Ministria ruse e Mbrojtjes raportoi se sistemet ruse të mbrojtjes ajrore kanë kapur dhe shkatërruar 235 dronë ukrainas gjatë natës: 35 u rrëzuan në rajonin e Bryansk, 32 në Republikën e Krimesë, 22 në rajonin e Krasnodarit, 15 në rajonin e Tulës, 13 në rajonin e Kalugës, 7 në rajonin e Kurskut, 4 në rajonin e Ryazanit, 4 në rajonin e Rostovit, 3 në rajonin e Belgorodit, 2 në rajonin e Leningradit, një në rajonin e Smolenskut, një në rajonin e Pskovit, një në rajonin e Novgorodit dhe një në rajonin e Moskës.