Lufta/ OKB sulmon Izraelin: Gjysma e popullsisë po vdes nga uria në Gaza! Hamasi: Asnjë peng s'do lirohet pa negociata! Netanyahu: Mos vdisni për Sinwar

Rafah, Egjipt

Njëzet e shtatë fëmijë, nga të cilët 15 të plagosur nga bombardimet dhe 12 me kancer ose sëmundje të veshkave, mbërritën mbrëmje e kësaj të diele nga Rripi i Gazës në Rafah të Egjiptit.

Lajmi është bërë i ditur nga Gjysmëhëna e Kuqe egjiptiane.

Zëdhënësi zyrtar i Guvernatorit të Sinait të Veriut, Muhammad Salim, bëri të ditur se sot aeroporti Al-Arish ka pritur 7 avionë të ngarkuar me ndihma humanitare të destinuar për në Gaza, nga të cilat 3 ishin nga Katari, 1 nga Kuvajti, Emiratet, Kazakistani dhe Franca.

Salim shtoi se numri i avionëve me ndihma që kanë mbërritur në aeroportin Al-Arish në Sinai verior nga 12 tetori deri më sot është 287.

Spitali Yaha, Rripi i Gazës.

Ghebreyesus, tha të dielën se do të jetë e pamundur të përmirësohet situata "katastrofike" shëndetësore në Gazë, edhe pse bordi miratoi me konsenus një mocion urgjent të OBSH-së për të bërë të mundur qasjen ndaj ndihmës mjekësore.

Zyrtarët palestinezë e kanë cilësuar gjithashtu situatën shëndetësore në Gazë si katastrofike. Sulmet e Izraelit kanë lënë shumicën e popullsisë të pastrehë, me pak energji elektrike, ushqim ose ujë të pastër dhe një sistem mjekësor në kolaps.

Mocioni urgjent, i propozuar nga Afganistani, Katari, Jemeni dhe Maroku, kërkon dërgimin në Gazë të personelit dhe furnizimeve mjekësore, që OBSH-ja të dokumentojë dhunën kundër punonjësve të kujdesit shëndetësor dhe pacientëve si dhe të sigurojë fonde për rindërtimin e spitaleve.

“Duhet të jem i sinqertë me ju: këto detyra janë pothuajse të pamundura në rrethanat aktuale”, tha shefi i OBSH-së Tedros Adhanom Ghebreyesus.

Zoti Tedros i tha bordit prej 34 anëtarësh në Gjenevë se nevojat mjekësore në Gazë janë shtuar, rreziku i sëmundjeve është rritur, ndërsa sistemi shëndetësor është reduktuar në një të tretën e kapacitetit që ishte para konfliktit.

Dr. Mustafa Barghouti, një politikan palestinez që kryeson Unionin e Komiteteve Palestineze të Ndihmës Mjekësore me 25 ekipe që punojnë në Gazë, tha se: "gjysma e Gazës tani po vdes nga uria".

Ai tha se 350 mijë njerëz kanë infeksione, përfshirë 115 mijë me infeksione të rënda të frymëmarrjes.

Sipas tij, shumë vuajnë nga probleme të stomakut, sepse ka pak ujë të pastër dhe ka pak mundësi për ta zier atë, duke rrezikuar shpërthimin e dizenterisë, tifos dhe kolerës.

Spitalet e Gazës janë bombarduar, rrethuar ose bastisur si pjesë e ofensivës së Izraelit ndaj sulmeve vdekjeprurëse të Hamasit më 7 tetor.

Spitalet që janë ende të hapur janë të mbingarkuara nga numri i të vdekurve dhe të plagosurve që vijnë për trajtim.Ndonjëherë ndërhyrjet kryhen pa anestezi.

Sipas të dhënave të OBSH-së, që prej 7 tetorit , janë kryer 449 sulme në objektet e kujdesit shëndetësor në territoret palestineze./ VOA

Hamasi ka paralajmëruar se "nuk do të lirojë asnjë peng izraelit pa negociata". Ky është mesazhi i dhënë nga krahu i armatosur i Hamasit,  al-Qassam Abu Obaida për izraelitët.

Kryeministrit izraelit Benjamin Netanyahu, u ka dërguar një mesazh militantëve të Hamasit. Ai u bën thirrje që të dorëzohen dhe të mos vdesin për Sinwar që është kreu i grupit të Hamasit. 

"Mos vdis për Sinwar. Dorëzohu tani", ka thënë Netanyahu.

Familjarët e pengjeve izraelite

Zyra e kryeministrit izraelit është shprehur për mediat amerikane se aktualisht në Gaza ndodhen 137 pengje izraelite, nga të cilët 20 dyshohet se mund të kenë vdekur.

Në një sqarim për CNN, Izraeli shprehet se viktima e fundit ishte Sahar Baruch , 25-vjeçari i cili, sipas Hamasit, u vra në përpjekjen e dështuar të ushtrisë izraelite për ta liruar.

Papa Françesku

Papa Françesku ka ripërsëritur thirrjen e tij për ndalimin e luftrave anëmbanë botës dhe ka theksuar se mënyra më e mirë për zgjidhjen e problemeve është trajtimi i tyre me urtësi dhe durim. 

“Le të vazhdojmë të lutemi për popujt që vuajnë nga lufta, teksa Krishtlindjet afrojnë, a do të mundemi, me ndihmën e Zotit, të bëjmë hapa konkretë drejt paqes? Nuk është e lehtë, disa konflikte kanë rrënjë të thella historike, por kemi edhe dëshminë e burrave dhe grave që kanë punuar me urtësi dhe durim për bashkëjetesë paqësore, le të ndjekim shembullin e tyre”,- është shprehur Papa Françesku në Angelus në Piazza San.

Gaza

Ministri i Jashtëm i Jordanisë, Ayman Safadi, tha të dielën se Izraeli po e zbaton një politikë për t’i detyruar palestinezët të ikin nga Gaza përmes një lufte që i përputhet “përkufizimit ligjor të gjenocidit”.

Izraeli i ka hedhur poshtë këto akuza duke i cilësuar si “gënjeshtra”.

Safadi, vendi i të cilit përkufizohet me Bregun Perëndimor dhe i pranoi shumicën e palestinezëve pas krijimit të Izraelit më 1948, theksoi se Izraeli ka mbjell urrejtje e cila do ta mundojë rajonin dhe përcaktojë gjeneratat e ardhshme.

Izraeli është duke u përballur me kritika dhe thirrje për një armëpushim, sepse i ka vrarë mijëra palestinezë civilë dhe i ka zhvendosur gati 85 për qind të 2.3 milionë banorëve të Gazës brenda territorit të rrethuar, ku, sipas OKB-së, nuk ka mbetur me asnjë vend i sigurt për t’u strehuar.

“Ajo cfarë po shohim në Gazë nuk është thjesht vrasje e njerëzve të pafajshëm dhe shkatërrim i vendbanimeve të tyre [nga Izraeli] por një përpjekje sistematike për ta zbrazur tërë Gazën”, tha Safadi në një konferencë në Doha.

Zëdhënësi i Qeverisë së Izraelit, Eylon Levy, i hodhi poshtë akuzat e Jordanisë, duke thënë: “Natyrisht, këto janë akuza të rrejshme dhe fyese”.

“Izraeli po lufton për ta mbrojtur veten nga përbindëshat që e kryen masakrën e 7 tetorit, dhe qëllimi i ofensivës tonë është t’i sjellim para drejtësisë këta përbindësha dhe të sigurohemi se ata nuk mund ta lëndojë popullin tonë kurrë më”, tha Levy.

Izraeli u ka bërë thirrje civilëve në Gazë të largohen nga fushëbetejat për sigurinë e tyre dhe dëshiron që edhe tjerët ta përsërisin këtë thirrje, tha Levy./ REL

Ushtarët e Hamasit

Izraeli beson se Hamasi kishte rreth 30 mijë luftëtarë në Gaza përpara se të fillonte lufta më 7 tetor.  Luftëtarët u ndanë në pesë brigada, 24 batalione dhe afërsisht 140 kompani, thanë Forcat e Mbrojtjes izraelite për CNN, secila me aftësi duke përfshirë raketa antitank, snajperë dhe inxhinierë, si dhe grupe raketash dhe mortajash.

Këshilltari i sigurisë kombëtare i Izraelit Tzachi Hanegbi vlerësoi të shtunën se të paktën 7,000 nga njerëzit e vrarë në Gaza që nga 7 tetori ishin terroristë të Hamasit.

Hangebi shtoi se ai nuk mendonte se udhëheqja e Hamasit kishte pritur shtrirjen e përgjigjes së Izraelit ndaj sulmit kundër Izraelit jugor më 7 tetor, në të cilin u vranë rreth 1200 njerëz. 

Ministria e Shëndetësisë e drejtuar nga Hamasi në Gaza tha të shtunën se 17,700 njerëz ishin vrarë në territor që nga 7 tetori.

Momenti kur izraelitët bombardojnë pjesën jugore të Libanit

Forcat ajrore izraelite janë duke kryer sulme ajrore në jug të Libanit, kanë njoftuar mediat libaneze. Pamjet e postuara në rrjetet sociale, shfaqin shpërthime masive në një zonë të gjelbëruar,

Sulmet vijnë pasi janë lëshuar sirenat, që paralajmërojnë sulmet me dronë dhe raketa në pjesën perëndimore të Galilee në Izrael.

Megjithatë nuk dihet nëse ndonjë bombë apo dron kamikaz të ketë goditur këtë rajon, ndërkaq nga IDF-ja izraelite nuk kanë komentuar mbi këtë çështje.

Në anën tjetër, IDF-ja ka njoftuar se nuk do të ndalet së sulmuari në Rripin e Gazës, derisa të arrijë ta shkatërrojë plotësisht Hamasin.

Benjamin Netanyahu

Kryeministri izraelit, Benjamin Netanyahu, refuzon thirrjet për t'i dhënë fund konfliktit në Gaza, duke i konsideruar thirrjet për ta bërë këtë "të papajtueshme" me mbështetjen për qëllimin e deklaruar të Izraelit për "eliminimin" e Hamasit pas sulmit të 7 tetorit në Izrael. 

Netanyahu i tha qeverisë se u kishte thënë liderëve të Francës, Gjermanisë dhe vendeve të tjera se "ata nuk mund të mbështesin nga njëra anë eliminimin e Hamasit dhe nga ana tjetër të bëjnë presion mbi ne për t'i dhënë fund luftës, gjë që do të pengonte eliminimin e Hamasit. 

Netanyahu, raporton shtypi izraelit, falenderoi gjithashtu presidentin amerikan, Joe Biden, për veton e SHBA ndaj rezolutës së Këshillit të Sigurimit të OKB-së për një armëpushim të menjëhershëm në Gaza.

Vladimir Putin dhe Benjamin Netanyahu

Në bisedën e tij telefonike 50-minutëshe me Presidentin e Rusisë, Vladimir Putin, Presidenti izraelit, Benjamin Netanyahu "kritikoi ashpër bashkëpunimin e rrezikshëm midis Rusisë dhe Iranit". 

Kështu thuhet në një shënim nga zyra e kryeministrit izraelit, ku jepet një rrëfim i telefonatës, e dyta mes dy liderëve pas asaj të 16 tetorit, në të cilën ai shprehu gjithashtu “zhgënjim” për fjalët e folura në Të premten në Këshillin e Sigurisë së OKB-së nga përfaqësuesi rus.

Foto nga Gaza

Ministri i Jashtëm rus Sergei Lavrov tha se sulmi i pësuar nga Izraeli më 7 tetor “nuk mund të justifikojë ndëshkimin kolektiv të palestinezëve.

Sergei Lavrov

Hamasi kreu një sulm terrorist ndaj Izraelit, të cilin Rusia e dënoi, Moska mban kontakte vetëm me byronë politike të Hamasit. Këtë e ka përsëritur edhe ministri i Jashtëm i Moskës, Sergej Lavrov. 

Lajmin e bën të ditur Ria Novosti. "Hamasi kreu një sulm terrorist më 7 tetor, të cilin ne e dënuam menjëherë.

Hamasi ka një degë politike që vepron në Doha dhe me të cilën kemi marrëdhënie për të diskutuar fatin e njerëzve të marrë peng", tha ministri duke folur në formatin virtual në. Forumi i Dohas.

 Lavrov theksoi se ai i referohej qytetarëve të Rusisë dhe vendeve fqinje dhe Izraelit.

Mia Schem

Mia Schem, e cila u rrëmbye në festivalin e muzikës Supernova gjatë sulmit të Hamasit më 7 tetor, është liruar pas 7 javësh robëri. Vajza e re, e çliruar nga duart e Hamasit, zbuloi tatuazhin e saj të ri.

Schem ndau fotot e tatuazhit në rrjetet sociale ku përfshihen fjalët “Ne do të kërcejmë përsëri”, së bashku me 7 tetorin, datën kur ajo dhe dhjetëra të tjerë u rrëmbyen nga festivali dhe më shumë se 360 ​​u masakruan atje.

“Nuk do ta harroj kurrë 7 tetorin 2023. Dhimbja dhe frika, kohët e vështira, miqtë që nuk do të kthehen më dhe ata që duhet të kthejmë. Por ne do të fitojmë, do të kërcejmë! Ne do të kërcejmë përsëri. Terroristët e Hamasit duan të na shuajnë dritën. Por ata kurrë nuk do të kenë sukses. Ne do të ngrihemi nga hiri, do të jetojmë. Kjo është historia e popullit tonë. Populli i Izraelit jeton”, ka shkruar ajo në postimin e saj në Instagram.

Gaza pas bombardimeve izraelite

Përpjekjet ndërmjetësuese për të arritur një armëpushim në luftën midis Izraelit dhe Hamasit palestinez në Rripin e Gazës vazhdojnë pavarësisht bombardimeve të pandërprera izraelite të cilat "zvogëlojnë shanset" për "një rezultat pozitiv". 

Kështu deklaroi kryeministri i Katarit, Mohammed bin Abdelrahmane Al-Thani gjatë Forumit të Dohas. 

"Përpjekjet tona, të realizuara së bashku me partnerët tanë, vazhdojnë. Ne nuk do të dorëzohemi", tha ai.

Gaza pas bombardimeve izraelite

Një armëpushim është jetik për t'i dhënë fund "ferrit në tokë" në Gaza: kështu kreu i agjencisë së OKB-së për refugjatët palestinezë (UNRWA), Philippe Lazzarini, në Forumin e Dohas (Katar), raporton BBC. 

“Dehumanizimi i palestinezëve i ka lejuar komunitetit ndërkombëtar të tolerojë sulmet e vazhdueshme izraelite në Gaza. Është sigurisht situata më e keqe që kam parë ndonjëherë. Njerëzit vijnë në OKB për të kërkuar mbrojtje, por as flamuri blu nuk mbrohet më. Situata ka arritur një natyrë katastrofike', tha Lazzarini, duke theksuar se agjencia është në prag të kolapsit.

Foto nga tanket izraelite në Gaza

"Forcat e Mbrojtjes izraelite janë të gatshëm për një konflikt në fronte të shumta", kështu deklaroi Avigdor Lieberman, ish-ministër i Jashtëm dhe i Mbrojtjes i Izraelit dhe themelues i partisë Israel Beytenu.

Ai kë gjë e deklaroi në një intervistë për radion 103Fm. 

"Ne duhet të përfundojmë luftën në Gaza dhe të përgatitemi për një tjetër në veri, është e pashmangshme", tha ai në deklaratat e rinisura nga Jerusalem Post me një referencë të qartë për kufirin me Libanin dhe Hezbollahun libanez.

Gaza pas bombardimeve izraelite

Burime izraelite, të cituara nga Kan TV, vlerësuan se lufta në Gaza mund të vazhdojë për "dy muaj". 

Të njëjtat burime shtuan se pas kësaj periudhe nuk do të ketë armëpushim, por operacione të lokalizuara të kryera nga forcat që do të qëndrojnë pranë Rripit të Gazës.

Foto nga dorëzimi i ushtarëve të Hamasit tek ushtria izraelite

Të shtunën në mëngjes (9 Dhjetor) u publikuan pamjet nga Rripi verior i Gazës, ku shfaqej një zyrtar i Hamasit duke vendosur ngadalë një pushkë në tokë ndërsa dhjetëra palestinezë u dorëzuan në trupat e IDF.

Sipas Times of Israel, në fillim të javës u qarkulluan imazhe në mediat sociale që tregonin dhjetëra burra të arrestuar nga IDF.

Zëdhënësi i ushtrisë tha më vonë se të gjithë në zonë po merreshin në pyetje dhe ishin dorëzuar pas luftimeve.

Zyrtarët ushtarakë thanë se operativët e Hamasit po i dorëzohen gjithnjë e më shumë IDF-së në pjesë të tjera të Gazës në mes të luftimeve.

Në pamjet e publikuara, anëtarët e Hamasit shihen radhazi, teksa dorëzohen dhe vendosin armët vetëm të veshur me të brendshme, me sa duket për t’u siguruar që nuk kanë veshur jelekë vetëvrasës me mjet shpërthyes.

Banorët duke u larguar nga Gaza

Gjysma e popullsisë së Gazës po vdes nga uria ndërsa luftimet mes Hamasit dhe Izraelit vazhdojnë. Kështu deklaroi zëvendësdrejtori i Programit Botëror të Ushqimit të Kombeve të Bashkuara (WFP), Carl Skau.

Vetëm një pjesë e vogël e furnizimeve të nevojshme kanë arritur në Gaza dhe në disa zona, ku nëntë nga 10 familje nuk janë në gjendje të hanë çdo ditë, shtoi zyrtari.

Ai theksoi se kushtet në Gaza e kanë bërë dërgimin e ndihmave humanitare "pothuajse të pamundur".

Foto nga Gaza pas bombardimeve izraelite

Më shumë se 5.000 ushtarë izraelitë janë plagosur në Gaza që nga fillimi i konfliktit më 7 tetor, me më shumë se 2.000 të njohur zyrtarisht nga Ministria e Mbrojtjes si invalidë, zbuloi një gazetë izraelite të shtunën (9 Dhjetor), duke shtuar se më shumë se 58% e të plagosurve kanë pësuar dëmtime serioze në duart dhe këmbët e tyre, duke bërë të nevojshme edhe amputime.

“Më shumë se 5.000 ushtarë të plagosur kanë mbërritur në spitalet në Izrael. Më shumë se 2.000 janë njohur zyrtarisht nga Ministria e Mbrojtjes si invalidë”, raporton gazeta izraelite Yedioth Ahronoth.

“Nuk kemi përjetuar kurrë diçka të tillë. Më shumë se 58 për qind e të plagosurve që marrim kanë lëndime serioze në duart dhe këmbët e tyre, duke përfshirë amputime. Rreth 12% e lëndimeve janë të brendshme që përbëhen nga dëmtimi i shpretkës, veshkave dhe këputja e organeve të brendshme. Rreth 7 për qind vuajnë nga shqetësime psikologjike, një numër që ne e dimë se do të rritet ndjeshëm”, tha për gazetën Limor Luria, zëvendësdrejtoreshë e përgjithshme dhe shefe e Departamentit të Rehabilitimit të Ministrisë së Mbrojtjes të Izraelit.

Ushtria izraelite ka thënë se të paktën 420 ushtarë janë vrarë që nga shpërthimi i konfliktit të Gazës më 7 tetor.

Izraeli rifilloi ofensivën e tij ushtarake kundër Rripit të Gazës më 1 dhjetor pas përfundimit të pauzës humanitare njëjavore me grupin palestinez Hamas.

Të paktën 17.487 palestinezë janë vrarë dhe më shumë se 46.480 të tjerë janë plagosur në sulmet intensive ajrore dhe tokësore në enklavë që nga 7 tetori pas një sulmi ndërkufitar nga Hamasi.

Sipas shifrave zyrtare, numri i të vdekurve izraelitë është 1.200.