Të paktën 10 shqiptarë besohet se kanë humbur jetën deri tani në luftën kundër regjimit të presidentit Bashar al-Assad në Siri.

Mediat kosovare bëjnë të ditur se 22-vjeçari, Muhamet Koprova është viktima e fundit në Siri. I riu nga Mitrovica por me banim në Suedi është vrarë javën e kaluar duke luftuar në krah të forcave rebele.

“Koha Ditore” duke iu referuar burimeve nga Inteligjenca thekson se tetë shqiptarë të vrarë janë nga Kosova, Lugina e Preshevës dhe Shqipëria, ndërsa dy të tjerë janë shtetas sirianë me prejardhje nga Kosova.

“Deri tani thuhet se janë vrarë gjithsej 10 shqiptarë. I pari është vrarë kosovari Naman Demolli, pastaj Musë Ahmeti, shqiptar tjetër nga Terrnoci i Kosovës, Ebu Omer-El Albani nga Shqipëria dhe i fundit Muhamet Koprova. Ndërsa dy shqiptarë të tjerë janë me shtetësi siriane - Mynyr Arnauti dhe Behlul Arnauti”.

Sipas të njëjtit burim, katër shqiptarë të tjerë nga Shqipëria janë vrarë, por ende nuk ka konfirmim zyrtar për identitetin e tyre- shkruan “Koha Ditore”

Besohet që numri i përgjithshëm i shqiptarëve të përfshirë në luftën siriane të jetë 140 dhe ata janë të ndara në dy grupe, në Alepo.

Redaksia Online
(Gre.M/Shqiptarja.com)