Mandati i Rehovicës, Vasili:
Përgjegjësitë janë individuale

Kreu i grupit parlamentar të LSI, Petrit Vasili ka reaguar për herë të parë pas kërkesës së Prokurorisë drejtuar KQZ-së për heqjen e mandatit të deputetit Gledion Rehovicës. Në një bashkëbisedim me gazetarët rreth mesditës së sotme, Vasili tha se për këtë ka dëgjuar në media, por shtoi se do të jetë vetë deputeti Rehovica që do të hedhë dritë mbi ngjarjen, pasi sipas tij përgjegjësitë janë individuale.

“Kam dëgjuar një komunikim nëpërmjet medias dhe besoj që z.Rehovica do ta sqarojë të gjithë situatën, por në ditët në vijim do njiheni me qëndrimin e vetë deputetit lidhur me këtë çështje. Ai do të jetë në dispozicion të të gjitha procedurave që do zhvillohen. Përgjegjësia do të jetë individuale për deputetin, LSI s’mban përgjegjësi për njerëzit që shkelin ligjin. Deputeti do të përgjigjet vetë”, u shpreh Vasili. 

Dy ditë më parë, Prokuroria e Përgjithshme i kërkoi KQZ-së heqjen e mandatit të deputetit për deputetin e LSI, Gledion Rehovica dhe atë të PDIU, Aqif Rakipi pasi nuk kanë deklaruar në formular ndalimet në Itali për vjedhje. Gjithashtu, një raportin e Prokurorisë thuhet se dy deputetët kanë deklaruar emra të rremë në Itali në momentin e ndalimit nga policia.  

Redaksia Online
l.q/Shqiptarja.com

TAG:
• kqz