Marrëveshja e Prespës/ Protestë e agravuar përpara parlamentit grek, disa të plagosur dhe 4 të ndaluar

Seanca e djeshme plenare e parlamentit grek në kuadër të Marrëveshjes së Prespës, është shoqëruar në ambientet e saj të jashtme nga një protestë e dhunshme që solli disa të lënduar dhe katër të ndaluar.

Një grup prej rreth 100 personash kanë hedhur gurë dhe fishekzjarrë kundër forcave të policisë, ndërkohë që, këta të fundit iu përgjigjën me granata shpërthyese dhe gaz lotsjellës. Dhjetëra policë zbritën në vazhdim në sheshin “Sindagma” për të shpërndarë turmën e protestuesve, duke përdorur shkopinjtë e gomës. Prej përleshjeve, disa persona u plagosën dhe u dërguan në spital dhe 4 të tjerë u ndaluan nga forcat e rendit. 

Ndërkohë, debati brenda godinës së parlamentit grek ishte i ashpër, nuk munguan as përplasjet, apo akuzat për tradhti kombëtare. Deputetët e opozitës konservatore akuzojnë konkretisht qeverinë se ka shitur sovranitetin e vendit, ndërsa e cilësojnë Marrëveshjen e Prespës si shumë të dëmshme për interesat kombëtare greke.

Në vazhdën e tensioneve, parlamenti grek e shtyu për të premten votimin e Marrëveshjes së Prespës, që e njeh vendin fqinj me emrin “Maqedonia e Veriut”.

TAG:
• proteste
• Parlamenti grek
• marreveshja e prespes