Marrëveshja për Skavicën, Kim: E bën Shqipërinë eksportuese të energjisë në rajon, përparim në marrëdhëniet në biznes mes saj dhe SHBA

Nënshkrimi i marrëveshjes për Skavicën mes kompanisë amerikane Bechtel dhe KESH është përshëndetur nga ambasadorja e SHBA-së, Yuri Kim. Diplomatja rendit disa arsye se pse kjo marrëveshje është mjaft e rëndësishme ku do të fuqizojë Shqipërinë në pozicionin e saj si eksportuese e energjisë në rajon dhe do të fuqizojë ekonominë e saj.

Ambasadorja Kim shton se kjo marrëveshje shënon dhe përparim për përthithjen e investimeve amerikane në Shqipëri, një nga prioritet që ambasadorja ka vendosur në detyrën e saj gjatë mandatit në Tiranë.

“Marrëveshja me hidrocentralin Skavica është domethënëse për shumë arsye: shënon një përparim të ri në biznes mes SHBA-së dhe Shqipërisë; do të rrisë furnizimin me energji për ekonominë në rritje të Shqipërisë; dhe pozicionin e Shqipërisë për të qenë një eksportues neto i furnizimit me energji, diversifikimit dhe sigurisë në rajon”, shkruan Kim

LEXO EDHE:
"A pi ujë drejtësia!", protestë para Prokurorisë së Lezhës, banorët kërkojnë hetime për dy hidrocentrale: Ndërtohen me firma të falsifikuara

Dy ditë më parë u nënshkrua kontrata për fazën e parë, mes kompanisë Bechtel dhe KESH, për projektin e HEC Skavicës. Ky HEC-i do të ndikojë në përmirësimin e situatës së përmbytjeve gjatë dimrit në zonën e nën Shkodrës dhe do të luajë një rol të rëndësishëm edhe për hidrocentralet e tjera ekzistuese në kaskadën e Drinit.

Kontrata me kompaninë amerikane do të ndahet në dy faza. Në fazën e parë do të përfshihen propozimi i kompanisë së bashku me mbështetjen financiare që do jetë nga vetë kompania, do të zhvillohen studime gjeologjike, do të përgatitet projekti teknik, do vlerësohet ndikimi mjedisor dhe më pas do të dilet në një ide përfundimtare dhe zgjat 18 muaj. Ndërsa faza e dytë konsiston në projektimin dhe ndërtimin e hidrocentralit të Skavicës.

TAG:
• HEC
• Yuri Kim
• Skavica