Masakra e 2 Prillit/ Meta nga Shkodra: Shqipëria vuan ende nga fenomeni i partisë-shtet! Momenti të nisemi të gjithë drejt 25 prillit (VIDEO)

Presidenti Ilir Meta ishte sot i pranishëm në Shkodër, ku mori pjesë në ceremoninë përkujtimore për masakrën e 2 Prillit, ku tha se edhe pas 30 vitesh, Shqipëria vuan ende nga "fenomeni i partisë-shtet".

Meta tha se ende në Shqipëri mungon demokracia dhe zgjedhjet e lira, ndërsa i bëri thirrje shqiptarëve se "është momenti të nisemi të gjithë drejt 25 prillit".

"Sot bëhen tre dekada nga 2 prilli i vitit 1991, kur katër djem nga më të mirët e Shkodrës dhe të Shqipërisë, Arben Broci, Bujar Bishanaku, Nazmi Kryeziu e Besnik Ceka, u vranë pabesisht, pikërisht sepse ishin të vendosur në mbrojtje të demokracisë dhe të zgjedhjeve të lira. Sot në Shkodër, jo vetëm nderojmë kujtimin e tyre të paharruar, por angazhohemi për ta çuar deri në fund amanetin e tyre dhe të gjithë dëshmorëve të tjerë që ranë për demokracinë, për zgjedhje të lira dhe për fjalën e mendimin e lirë, sepse Shqipëria ende vuan mungesën e tyre. Fatkeqësisht, Shqipëria ende vuan nga fenomeni i partisë-shtet dhe nga kapja e shtetit, që ka mbajtur peng edhe procesin e integrimit europian prej kaq vitesh. Ndaj është momenti që të gjithë të nisemi drejt 25 prillit, kësaj dite vendimtare për ta rivendosur vendin në shinat e Kushtetutës dhe të demokracisë, sepse në themel të Kushtetutës sonë qëndron pluralizmi politik, zgjedhjet e lira dhe vota e lirë dhe e barabartë e çdo qytetari të kësaj Republike. Unë jam i bindur se Shkodra do të jetë si gjithmonë, sot akoma edhe më shumë, në krye të këtij marshimi, sepse ka qenë zemra dhe frymëzimi për demokracinë edhe në kohët më të errëta të vendit.  Të bëjmë çdo gjë për suksesin e demokracisë, të zgjedhjeve të lira dhe të së ardhmes europiane të Shqipërisë, që do ta ndërtojmë mbi sakrificat e martirëve të 2 prillit, por njëkohësisht edhe të gjithë atyre, të cilët në emër të fjalës së lirë, të demokracisë, por edhe në emër të lirisë së besimit u martirizuan gjatë së shkuarës së errët totalitare", tha Meta.

LEXO EDHE:
Meta: Në Partinë e Lirisë jo më gra skemaxhie e mendjen tek takat e larta, por gra si burra, dhjetra si Erisa Xhixho

 

Lajmi kryesor:

30 vite nga masakra e 2 Prillit/ Basha: Kjo ditë i jep kuptim të veçantë lëvizjes tonë sot! Meta: 4 të rinjtë u vranë pabesisht, Shqipëria vuan ende fenomenin e partisë-shtet

TAG:
• Shkoder
• Ilir Meta
• lulzim basha
• jozefina topalli
• masakra e 2 prillit