Masakra me helmimin e qenve në Lezhë, Bashkia asnjë strategji për trajtimin e tyre! Në buxhetin e 2022 një fond i posaçëm për rehabilitimin e qenve endacakë

Qentë e rrugës teksa lëvizin kope në qendër të Lezhës përbëjnë kërcënim për qytetarët, të cilët shpesh kanë rënë pre e kafshimeve.

"Janë shumë problem, u turren fëmijëve", thotë një qytetar.

"Problem janë, unë i kam frikë", shprehet një tjetër.

LEXO EDHE:
VIDEO/ Ja si duket spitali i Mirditës pas rikonstruksionit, shërbim për rreth 50 mijë pacientë

Përballë këtij shqetësimi në rritje, Bashkia e Lezhës ka gjetur rrugën më të shkurtër, duke helmuar masivisht qentë, që tashmë shihen të japin shpirt në shëtitore e lulishte.

Zyrtarisht vendorët nuk prononcohen, por jashtë kamerave thanë se nuk kanë trajtuar asnjëherë kafshët e rrugëve. Burimet shprehen se në buxhetin e vitit 2022 është parashikuar një fond i posaçëm për sterilizimin dhe rehabilitimin e qenve endacakë. E deri atëherë, qytetarët do të përballen me këtë shfaqje të shëmtuar dhe mbi të gjitha të jashtëligjshme.

"Mirë është të marrë masa bashkia, se nuk vriten. Të grumbullohen diku e të rehabilitohen, por jo të vriten", shprehet një qytetar.

Kjo problematikë është hasur më herët dhe në Korçë e Vlorë, ku institucionet vendore nuk kanë asnjë strategji dhe as fonde për trajtimin e kafshëve të rrugëve ndaj përfundojnë në eliminimin e tyre. Ky veprim përveçse mizor është dhe antiligjor, pasi në kodin penal parashikohet dënimi deri në 3 vite burg për vrasjen e kafshëve.

/AV/Shqiptarja.com

TAG:
• Lezhe
• bashkia lezhe
• helmim
• qente e rruges