Mazniku për Report Tv: Godina e teatrit bombë me sahat, shembja u vendos me 55 vota! Projektin e Bjarke Ingels e morëm falas

Mazniku tha se në çdo punë të mirë që është bërë për Tiranën, ka pasur një pakicë që ka hedhur gjithmonë baltë. Në lidhje me diskutimet me artistët dhe shoqërinë civile, Mazniku tha se janë zhvilluar 28 të tilla dhe janë ezauruar çdo mendim duke u shfaqën në projektin përfundimtar.

"Kemi bërë më shumë se 28 takime me artistët për të diskutuar për teatrin dhe kjo pjesë e diskutimit është ezauruar. U gjendën para një pakicë që nuk është e gatshme të ndryshojë qëndrimin e vetë dhe një shumicë që është zgjedhur për të qeverisur dhe vendosur. Ndërtimi i një teatri të ri ka qenë premtim i fushatës së Veliaj dhe më këtë ka marrë votën. Nuk më shqetëson protestat, ne jemi mësuar me këtë histori që kur filluam me këndin e lojërave në Kodrat e Liqenit, një nga projektet më të bukura në këto 4 vite. Jemi mësuar se pas çdo pune të mirë ka një palë që është gati të hedh baltë, është pjesë e çmimi që paguajmë për progresin e bërë. Pazari i Ri, Bulevard i ri, sheshi Skënderbej, ndjej një krenari të madhe kur shoh këto punë që janë bërë për qytetin. Do të ndihen të turpëruar në të ardhmen ata që kanë protestuar sot, kur teatri i ri të jetë një nga projektet më të bukura dhe të rëndësishëm të rajonit jo vetëm Tiranës." tha Mazniku

Arbjan Mazniku tha se teatri i ri do të jetë modern me të gjitha kushtet dhe do të përfshijë dhe 3 salla, një e madhe me 600 vende dhe 2 më të vogla me 300 vende.

"Do të ketë 3 salla, një e madhe me 600 vende dhe dy salla me 300 veta dhe do të ketë një seri të dhomave më të vogla për provat dhe ushtrimet e shfaqjeve. Është bërë një diskutim shumë i gjatë mes artistëve dhe studion që bëri projektin. Është një objekt që synon me shumë krenar të mbajë 100 viteve e ardhshme të teatrit shqiptar", tha Mazniku

Nënkryetari i Bashkisë Tiranë, Mazniku tha se projekti është në detajimin teknike dhe inxhinierik dhe më pas do të hapet gara për kompanitë duke përfshirë dhe ata ndërkombëtare për ta ndërtuar.

"Kemi  nevojë tani të detajomë projektin në nivel teknik dhe inxhinierik që të marrë formën e tij ekzekutive e të kthehet nga një projekt-koncept në një projekt-zbatimi dhe të fillojmë më prokurimin e projektit. Do të ketë një procedure e tender publik ndërkombëtar për të zgjedhur një kompani që ta ndërtojë. Është e hapur edhe për firma të huaja", tha Mazniku.

Mazniku tha se janë tre arsye pse zgjodhën të mbanin projekt danez, ndërsa shtoi se ky projekt është marrë falas pasi arkitekti danez është paguar nga firma Fusha që u tërhoq, pasi ishte pjesë e marrëveshjes

"Kompania Fusha ka zgjedhur Bjarke ingels për partner dhe e kanë në kontratat e tyre. Projekti është përmirësuar është rregulluar kanë lëvizur disa element brenda saj, por në fundi si pasojë e kostove që u shtuan si pjesë e negocimit me artistët, marrëveshja u prish, pasi nuk i dilte llogaria e saj me kërkesat tona. Projekti na mbeti ne ishte pjesë e marrëveshjes me firmën Fusha. Ishte marrëveshje e bërë që në fillim. I pari është një projekt nga një arkitekt shumë i mirë, është punuar me artistët duke e sjellë sa më afër kërkesave të tyre në mjediset e teatrit, dhe e treta ne e marrim këtë projekt pa pasur nevojë të paguajmë për të si pjesë e marrëveshjes të bërë nga firma Fusha , kur u mbyll kontrata. Ka qene firma Fusha që ka paguar arkitektin", tha Mazniku.