Hetimi pasuror, Veliaj në Këshillin Bashkiak: U denoncova nga një njeri që s'ekziston, kurth i sajuar! Këtu do jemi, në maj u mundim

TIRANË- Kreu i Bashkisë së Tiranës, Erion Veliaj, nga mbledhja e Këshillit Bashkiak foli për marrjen në pyetje për 5 orë nga SPAK për hetimin pasuror. Veliaj, e cilësoi situatën një "kurth të sajuar", duke thënë se është denoncuar nga një person i quajtur Nesti Angoni, që sipas tij nuk ekziston.

Veliaj tha se përdorimi i letrave anonime për sulme politike është një praktikë e vjetër që synon të pengojë punën dhe progresin nga ata që nuk i mundon dot në betejat elektorale.

“Jam denoncuar në mënyrë anonime nga një qytetar që quhet Nesti Angoni, i cili nuk ekziston, për të na kthyer mallin e letrave anonime. Unë e kuptoj se disa njerez, që nuk na mundin dot në betejë, që nuk na mundin dot në zgjedhje, janë kthyer në zanatin e letrave anonime. 

LEXO EDHE:
Mero Baze: Denoncuesi 'anonim' i Veliajt dhe opozitarët e marrë me qira kundër tij

Nesti Angoni nuk ekziston, por të gjithë e dimë kë përfaqëson ky emër, çfarë mentaliteti përfaqëson, çfarë kulture linçuese përfaqëson ky stil. Megjithatë, pavarësisht se kryetari i bashkisë ka në zotërim të gjithë regjistrin civil dhe mund të verifikojë qartazi se është një kurth i sajuar, kam qenë bashkëpunues”, u shpreh Veliaj.

Një thumb e pati edhe për opozitën, duke thënë se ka qenë gjithnjë bashkëpunues me organet ligjzbatuese dhe nuk e ka sulmuar Prokurorinë e Posaçme duke e quajtur ‘SKAP’, kur nuk i intereson. Veliaj theksoi se të gjithë e dinë ku banon, ndërsa theksoi se “këtu do jemi, deri në maj do u mundim”.

“E di gjithë Tirana se ku jetoj unë, e di gjithë Tirana se ku banoj unë, ku isha para zgjedhjeve, ku vazhdoj pas zgjedhjeve, dhe ku do jem deri në fund të kësaj detyre. Unë hyj te ajo racë politikanësh që nuk i thotë SPAK-ut, “Skap” kur s'i intereson, dhe SPAK kur i intereson për kundërshtarët e vet.

Nuk kam organizuar antiprotesta, nuk kam bërë letra anonime, se vij nga një brez jo i letrave anonime dhe as nuk i them SPAK-ut 'plaç'. Këtu do jemi, në maj do t’ju mundim me gjithë letrat anonime, me gjithë kurthet dhe me gjithë klithmat e hienave”, nënvizoi Veliaj.

Pas fjalimit të tij, kryebashkiaku Veliaj u largua nga salla, çka solli reagimin e opozitës. 

“Të vijë këtu, detyra që kishte sot ishte të bënte transparencë se çfarë ka ndodhur sot”, tha anëtari i Këshillit Bashkiak të PD, Dorian Teliti.

Kryebashkiaku i Tiranës, Erion Veliaj u paraqit sot, 26 dhjetor, në Prokurorinë e Posaçme ku qëndroi për 5 orë. Nga burime mësohet se Veliaj është marrë në pyetje si person në dijeni në kuadër të hetimit pasuror që po kryen prokurori Ols Dado.

TAG:
• Këshilli Bashkiak i Tiranës
• erion veliaj
• bashkia tirane
• spak

Sondazhi i ditës:

Si ka qenë për ju viti 2024?

• I mirë

  44%

• I keq

  22.7%

• As i mirë as i keq

  33.3%

Vota total: 1496

Votat totale janë unike

• Sondazhi i ditës:

  Si ka qenë për ju viti 2024?

  I mirë I keq As i mirë as i keq