Policia shoqëron disa protestues pas veprimeve të dhunshme, lirohet djali i Luan Baçit (VIDEO)

Disa ish-deputetët të Partisë Demokratike kanë shkuar pranë Drejtorisë së Policisë ku kërkojnë lirimin e protestuesve të cilët janë ndaluar ditën e sotme pas protestës së dhunshme të opozitës përpara kryeministrisë.

Mes të shoqëruarve është dhe djali i Luan Baçit, kreu të PD-së në Fier.

Ish-kryeministri Sali Berisha ka publikuar një video nga momenti kur policia u përpoq të shpërndante protestuesit të cilët tentuan të hyjnë me forcë në Kuvend. Ai akuzon efektivët e policisë e cila shpërdau protestuesit të cilët po përpiqeshin të pengonin punën e tyre për të ndaluar sulmin ndaj parlamentit.

"Nje video e nje barbarie shtazore!

Shikoni kriminelin si i jep viktimes goditjen e meshires!

Ne video nje i moshuar shtrire nga gazi ne toke, dy persona qe po e ndihmojne, njeri eshte ish deputeti Gent Strazimiri dhe nje narkopolic i droguar qe e godet te shtririn me sprite ne fytyre, si vrases i jep viktimes goditjen e meshires. sb", shkruan Berisha.

Zëdhënësja e Partisë Demokratike, Ina Zhupa ka publikuar video nga shoqërimi i djalit të Kreut të PD-së në Fier, Luan Baçit pas përfundimit të protestës së sotme duke e quajtur aktin e policisë të paprecedentë dhe të paligjshme.

Sipas saj në momentin kur djali i Luan Baçit ka filmuar dhunën që policia po i bënte protestuesve është sulmuar fizikisht e më pas është arrestuar nga policia.

Postim i plotë i Ina Zhupës:

Videot e dhunes policore te paprecedente dhe te paligjshme ndaj qytetareve te Fierit qe kishin marr pjese ne proteste.

Kryetarin e PD Fier Luan Baçi e lajmeruan qytetaret me telefon qe po dhunoheshin nga policia dhe ai bashke me djalin shkuan ne vendin e ngjarjes. Djali Bruno filloj te filmonte per te dokumentuar te verteten, pikerisht dhunen e policise ndaj qytetareve dhe ne kete moment ra vete viktime e dhunes se tyre.

Ne video e pare shikohet momenti kur Bruno Baçi, djali i kryetarit i PD Fier dhe ish deputeti Luan Baçi, del per te filmuar dhunen dhe nje polic i maskuar i sulet, e sulmon fizikisht edhe pastaj e arrestojne pasi e dhunuan. E papranueshme edhe jo ligjore.

Protestat do vazhdojne edhe me te fuqishme! Fieri dhe gjithe Shqiperia nuk ndalet nga hakmarrja primitive e nje kryeministri ne panik dhe te ikur!

Edhe sekretari i Përgjithshëm i partisë Demokratike, Gazmend Bardhi reagoi për protestën duke thënë se do të marrë ndëshkimin e merituar kushdo që ka dhunuar protestuesit

"Dënoj me forcë sulmin kriminal të Policisë së Shtetit me mjete të helmimit masiv ndaj qytetarëve, veçanërisht grave dhe fëmijëve në protestë. Kushdo që ka urdhëruar dhe ushtruar dhunë ndaj qytetarëve, në mënyrë të paligjshme dhe kriminale, do të marrë ndëshkimin e merituar!", shkruan Bardhi.

Drejtori i Përgjithshëm i Policisë së Shtetit, vizitoi në spitalin ushtarak punonjësit e Policisë të cilët u lënduan  gjatë protestës së ditës së sotme të zhvilluar para Parlamentit të Shqipërisë, ku protestuesit  ushtruan dhunë duke qëlluar me gurë, sende të forta dhe lëndë piroteknike.

Veliu është interesuar te mjekët për shëndetin e punonjësve të Policisë dhe u ka uruar atyre shërim të shpejtë.

Më pas Drejtor i i Përgjithshëm ka takuar në ambientet e jashtme të spitalit edhe një pjesë të kolegëve të punonjësve të lënduar, duke i falënderuar për gjakftohtësinë, seriozitetin dhe profesionalizmin e treguar gjatë protestës së sotme.

Një tjetër protestues i lënduar është vizituar në spital nga përfaqësues të Partisë Demokratike. ish-deputetët Albana Vokshi dhe Tritan Shehu, vizituan në spital Eduard Shoshën 50 vjeç, i cili sipas tyre, ka të thyera dy brinjë nga goditja me ujë me presion.

Për pasojë, protestuesi - thotë PD-ja, është përplasur në bordurë.

Ministri i Punëve të Brendshme, Sandër Lleshaj reagoi pasprotestës së opozitës, ku evidenton faktin se policia e Shtetit ishte në shenjestër të dhunës të manifestuesve që mësynë ndaj Kuvendit të Shqipërisë.

"Edhe sot Policia e Shtetit u vu në shënjestër të dhunës së verbër që mësynte ndaj Kuvendit të Shqipërisë. Keqardhje për degradimin e opozitës parlamentare në gjendje parapolitike dhe respekt për përgjegjshmërinë e profesionalizimin e Policisë së Shtetit", shkruan Lleshaj në një postim në rrjetet sociale.

Ish-deputeti Luçiano Boçi ka shkuar në spital pranë disa qytetarëve që mbetën të lënduar në protestën që opozita mbajti sot përreth 4 orë tek kryeministria fillimisht, dhe më tej edhe para parlamentit, aty ku shpërtheu dhuna.

"Brutaliteti i policisë, me përdorimin e lëndëve helmuese, mbi protestuesit ka sjellë dëmtime serioze për ta. Junta ushtarako-policore e Ramës ka ushtruar dhunë dhe ka goditur qytetarët. Kodhel Çala është sulmuar nga afër me pistoletë lënd-hedhëse, drejt e në sy.  Ka humbje shikimi dhe komplikacione në frymëmarrje. Flamurmbajtësi, i veshur me simbolet e flamurit, Ago Nuhaj, goditet dhe ai. Gjendja shëndetësore është e agravuar me shikimin dhe frymëmarrjen. Ky është regjimi i “hajdutit” psiqik. Fundi është afër", shkruan Boçi teksa ka publikuar edhe fotot e protestuesve të lënduar.

Policia e Shtetit reagoi pas protestës së sotme të opozitës ku evidenton faktin që zhvendosja nga kryeministria tek Parlamenti ishte në kundërshtim të plotë me ligjin, pasi nuk ishte theksuar ky itinerar në kërkesën që opozita kish bërë në polici për lejen e tubimit. Tre efektivë të policisë kanë mbetur të lënduar - thotë policia në një deklaratë zyrtare - të cilët u qëlluan me gurë dhe mjete të forta nga protestuesit, teksa ishin në një kordon sigurie para Kuvendit të Shqipërisë. Policia thotë se të lënduar pati edhe persona mes tubuesve për shkak të hedhjes së gazit në momentin kur turma çau kordonin e policisë. Policia thotë se pas ngritjes së grupit hetimor po punohet për të identifikuar autorët e përfshirë në episodet e dhunës.

Deklarata

Partia Demokratike e aleatët e saj, organizuan sot një tubim në Bulevardin “Dëshmorët e Kombit”, i cili, në kundërshtim të plotë me ligjin, në mënyrë të papritur dhe të pa lajmëruar, por edhe në kundërshtim me vetë kërkesën e organizatorëve për vendin e protestës, u zhvendos në sheshin para Kuvendit të Shqipërisë.

Gjatë tubimit të paligjshëm përpara Kuvendit, protestuesit krijuan incidente me Policinë dhe më pas e goditën, gjatë përpjekjes për të çarë kordonin e forcave të rendit. Mbi punonjësit e Policisë së Shtetit u hodhën gurë dhe mjete të tjera të forta. Për pasojë u lënduan dhe po mbahen në mbikëqyrje mjekësore 3 punonjës policie, të cilët janë jashtë rrezikut për jetën.

Edhe mes tubuesve pati të lënduar, si pasojë e efekteve të gazit lotsjellës, të përdorur nga Policia për të prapsur turmat e dhunshme.

Menjëherë pas mbylljes së tubimit, në vendin ku pati akte dhune mbi forca e rendit dhe ndaj institucionit të rëndësisë së veçantë, u ngrit një grup i posaçëm hetimor.

Nën drejtimin e Prokurorisë së Rrethit Gjyqësor Tiranë, grupi hetimor po punon për identifikimin e autorëve të përfshirë si dhe dokumentimin e plotë të çdo episodi dhune.

Punonjësit e Policisë së Shtetit, të cilët u angazhuan në menaxhimin e tubimit vepruan me përgjegjësi të lartë dhe profesionalizëm, në përputhje me ligjin, duke garantuar ruajtjen e rendit e sigurisë publike si dhe respektimin e të drejtave të qytetarëve.

Policia e Shtetit mbetet e angazhuar të sigurojë zhvillimin e çdo tubimi paqësor, duke garantuar në çdo rast, sigurinë e jetës së qytetarëve dhe rendin publik, në respekt e zbatim të Kushtetutës dhe ligjeve të vendit.

Djali i kryetarit të Partisë Demokratike për degën e Fierit, Luan Baçit, është shoqëruar nga policia pas përfundimit të protestës. Përmes një video të shpërndarë nga PD-ja, shihet momenti teksa efektivët e policisë së rendit kërkojnë të fusin në makinë djalin e kryetarit të PD-së. Luan Baçi e kundërshton këtë moment dhe thotë se me djalin në makinë do të futet edhe ai, pasi është thjesht një fëmijë.

Në video, dallohet që djali i Luan Baçi është i gjakosur pasi është qëlluar në fytyrë nga një person i paidentifikuar. Djali dëgjohet të thotë se personi që e qëlloi nuk ishte polic. 

"Mbajeni mend se çfarë kam për t'ju bërë. Do vij edhe unë me të. Po ai është fëmijë. Nëse e keni gjuajtur do e keni personale me mua", tha Baçi. Në video duken edhe persona të tjerë që shoqërohen në një automjet tjetër të policisë, të cilëve Baçi u drejtohet duke i thënë të mos tremben, pasi "këta janë legena, dhe nuk kanë çfarë t'i bëjnë".