Te rubrika e poezisë, vargjet e mrekullueshme shkruar nga Atë Gjergj Fishta, një emër i madh dhe një figurë e rëndësishme e historisë, trashëgimisë dhe kulturës shqiptare.

Melodia e Vargut nga Sonila Strakosha

Atdheut

N'ty mendoj kur agon drita,

Kur bylbyli mallshëm kndon,

N'ty mendoj kur soset dita,

Terri botën kur e mblon.

Veç se ty te shoh un n'andërr,

Veç se ty, cuet, t'kam n'mendim;

Ndër t'vështira ti m'je qandërr,

Për ty i lehtë m'vjen çdo ndëshkim.

Tjera brigje, fusha e zalle

Unë kam pa, larg tue ba shtek,

E përgjova tjera valle,

N'tjera lule syu m'u rrek;

Por nji fushë ma e blerët nuk shtrohet,

Por nji mal ma bukur s'rri,

Ma i kulluet nji lum s'dikohet,

Moj Shqypni, porsi i ke ti.

N'ty ma i bukur lulzon Prielli,

Janë ma t'kandshme stinë e mot;

N'ty bylbyli pa le dielli

Kndon ma ambël t'Madhit Zot.

Pa ty lules s'm'i vjen era,

Pa ty pema fryt nuk m'bjen:

Mue pa ty nuk m'del prendvera,

Pa ty dielli nuk m'shkelxen.

Dersa t'mundem me ligjrue

E sa gjall me frymë un jam,

Kurr Shqypni, s'kam me t'harrue,

Edhe n'vorr me t'përmend e kam.


Lajmi kryesor:

'Në Librari' sjell 3 tituj të rinj: ‘Fluturimi i shqiponjës’, ‘Ikanakët’ dhe ‘Panda e madhe dhe dragoi i vogël’