Merkato e deputetëve, Berisha i
lë jashtë listave, FRD: S’ju duam

TIRANE - Lëvizjet e deputetëve të PS drejt PD e garantimi i tyre në listat e sgurta për të qënë dhe një mandat në Kuvend, përfshirja në listat preferenciale të këshilltarëve të Berishës e zv.ministrat ka sjellë moskandidimin e shumë deputetëve të PD, që s’pranohen as nga FRD.

Afrimi i ditës së zbardhjes së listave të kandidatëve për deputetë ka sjellë dridhje më radhët e deputetëve aktualë demokratë. Përfshirja e një numri shumë të madh këshilltarësh dhe drejtuesish të niveleve të dyta e të treta të qeverisjes, por që janë të mbështetur nga Berisha sjell largimin automatikisht nga listat preferenciale të kandidimit të gati 20 deputetëve aktualë.

Të cilët, teksa kanë verifikuar shpërndarjen e këtyre kandidatëve të rinj për deputetë “skifterë” të Berishës por dhe implementimit në listat e PD të deputetëve që ikur nga PS, kanë përllogaritur dhe mundësinë për të qënë në listat për deputetë të PD sipas qarqeve respektive.

Që tani kanë filluar ethet e mbetjes jashtë listave, ndërsa po kërkojnë një mundësi për të qenë kandidatë për deputetë në listat e partive aleate të Berishës, që gjithsesi janë jo në kushte komode për shkak se konsumimi nga qeverisja në 8 vite ndikon në rrudhjen dhe më të mbështetjes për këto parti, që janë në kufijtë e ekzistencës.

“Valvula” shkarkuese në mënyrë normale mund të kishte qenë Fryma e Re Demokratike e drejtuar nga ish-presidenti Bamir Topi por dhe Aleanca Kuq e Zi e drejtuar nga Kreshnik Spahiu. Në kushte normale për spektrin politik të djathtë FRD duhej të kishte shërbyer si rrjetë për të gjitha rrjedhjet e PD, gjë që deri më tani ka shërbyer, duke mbledhur njerëzit më të pastër të PD, të cilët kanë qenë të zhgënjyer nga keqqeverisja e PD dhe që prej disa muajsh po punojnë për ngritjen e kësaj partie.

Ndërkohë në lidhje me këtë përpjekje të këtyre deputetëve demokratë të mbetur jashtë listave të Berishës për kandidatë për deputetë për të qenë pjesë e kontributit dhe listave të FRD, burime brenda partisë së Topit deklarojnë se tani është shumë vonë për të ikur nga PD dhe për ardhur në FRD, pasi kishin mjaft kohë për ta rrëzuar këtë qeveri dhe për të shpëtuar vendin nga një agoni e stërzgjatur.

Por sipas këtyre burimeve këta deputetë të PD zgjodhën t’i shërbejnë deri në fund Berishës, duke shkelur me të dyja këmbët ligjin dhe Kushtetutën pothuajse në të gjitha vendimet dhe ligjet që kanë votuar, pavarësisht se do të jenë jashtë listave të kandidimit në këto zgjedhje.

Nga FRD saktësohet se jo vetëm që nuk lëvizën më parë, por mbajtën dhe një qëndrim skandaloz në votimin e ministrave të rinj duke bashkuar votat me tre deputetë socialistë pas largimit të LSI dhe për më tepër as që kanë ndërmend që të hezitojnë të votojnë dhe për prishjen e KQZ.

Burimet brenda FRD konfirmojnë se tashmë të gjithë ata deputetë të PD që dëshirojnë të hyjnë në FRD dhe listat e saj të kandidimit do gjejnë derën mbyllur, me argumentin se s’marrin në këtë parti mbeturinat e Saliut. Kështu, deputetët e PD, pritet që në ndryshim nga ata të PS jo vetëm që do mbeten jashtë listave të Berishës, por s’kanë as ku të shkojnë.

“MERKATO” E DEPUTETËVE TË PD NDËR VITE

 

Lëvizjet e deputetëve 2009-2013

 

Largimet nga PD e LSI

Paulin Sterkaj nga PD te PS

Gazmend Oketa nga PD te FRD

Dritan Prifti nga LSI i pavarur

 

Lëvizjet e deputetëve 2005-2009

 

Largimet nga PD

Spartak Ngjela PD i pavarur

Gilman Bakalli PD i pavarur

 

Largimet të tjera

 

Hamit Kosta nga PDS te PS i pavarur

Albert Faruku PSD i pavarur

Angjelina Kola nga PSD te LSI

Nikollaq Neranxi nga PAA te LSI

Lejla Pernaska nga PR te PD

Pirro Lutaj nga PAD te PS

Pashk Ujka PAD PDK

Nard Ndoka nga PDR te PDK

Jak Ndokaj nga PDR te PDK

Frrok Gjini nga PDR te PDK

Nikollë Lesi nga PDK te LDK

Ferdinand Xhaferaj nga PDR te PD

Ymer Tola nga PAA te PDK

Shkrimi u botua sot në gazetën Shqiptarja.com (print) 13.04.2013

Redaksia Online
(b.m/shqiptarja.com)

/Shqiptarja.com

TAG:
• kqz