Qytetarët gjermanë i drejtohen të dielën (23 shkurt) kutive të votimit për të zgjedhur kancelarin e ri të vendit. Olaf Scholz, kancelari aktual nga Social-Demokratët e qendrës së majtë, Friedrich Merz, i partisë kryesore konservatore, Unioni Demokristian, zëvendëskancelari aktual, Robert Habeck, nga Të Gjelbrit, dhe Alice Weidel e partisë së ekstremit të djathtë Alternativa për Gjermaninë (AfD) janë kandidatët që konkurrojnë për kancelar të ardhshëm.

Sipas sondazheve parazgjedhore Unioni i Merz renditet në krye me rreth 30 % të votave, ndërsa AfD e dyta me rreth 20 % . Edhe pse Merz është favorit për ta zëvendësuar Scholz si kancelar nuk është ende e qartë se cilat koalicione qeverisëse do të jenë të mundshme pas zgjedhjeve pasi kjo do të varet pjesërisht edhe nga numri i partive në parlamentin e ri.

Së paku 59.2 milionë njerëz nga 84 milionë që ka Gjermania në total kanë të drejtë të votojnë për Dhomën e Ulët të Parlamentit. Më pas është Bundestagu me 630 anëtarë ai që do të zgjedhë kancelarin e ardhshëm. Në fletëvotim janë 29 parti, por gjasat janë që 5 deri në 8 prej tyre të marrin vota të mjaftueshme për të fituar ulëse në parlament. Në shumicën e rasteve partitë duhet të fitojnë së paku 5% të votave për të siguruar një numër ulësesh.

Zgjedhjet në Gjermani mbahen shtatë muaj më herët seç ka qenë e planifikuar, pasi koalicioni tripartiak i Scholz ra në nëntor, për shkak të mospajtimeve për rigjallërimin e ekonomisë e cila është tkurrur gjatë 2 viteve të fundit.

Një nga detyrat më urgjente të qeverisë së re do të jetë gjetja e një përgjigjeje koherente ndaj këtij problemi. Një sfidë tjetër do jetë reduktimi i mëtejshëm i migrimit të parregullt, i cili ka qenë ndër çështjet kryesore në fushatë.

Zgjedhjet parlamentare po shihen si një test ndaj reformës zgjedhore e cila u miratua pas debatesh të shumta e disa përpjekjeve të dështuara dhe pritet që të jenë një test për këtë sistem të ri.